Тываның Баштыңы республиканың студентилеринге байырын чедирген

Чылдың-на Тываның национал хөгжүм-шии театрынга Татьяна хүнүнде, азы Россияның Студентилер хүнүнде эртер ректорнуң балында Тываның Баштыңы Владислав Ховалыг хүндүлүг аалчы кылдыр киришкен.

Тываның күрүне университединиң аңгы-аңгы факультеттериниң база республиканың ортумак профессионал өөредилге черлерниң студентилери – өөредилгеге, эртемге, спортка, хөй-ниити болгаш волонтер ажылының эң идепкейжи болгаш чедиишкинниг оолдары, кыстарын байырлалче чалаан.

Владислав Ховалыг чыылганнарга байыр чедирбишаан, келир үеже планнарны тургузуп, боттарын көргүскен студент чылдар солун, чымыштыг эртер ужурлуг деп демдеглээн.

«Силерниң тура-сорууңар база амгы билиглериңер төрээн республикаңарга дыка херек» - деп, Тываның Баштыңы чугаалааш, өөренип турар мергежилдерин оолдар угаап шилип алган боор деп бүзүрелин илереткен. Республика аныяк специалистерни деткээн янзы-бүр хемчеглерни ботандырып турарын сагындырган. Чижээ, эрткен чылын көдээ черлерге ажылдаар күзелин илереткен 80 доозукчу деткимче акшаларны алган.

Ректор балының чараш чаңчылы езугаар, шылгараңгай он студентиге Тыва Республиканың Баштыңының стипендияларын тывыскан.

Тыва Республиканың Баштыңының стипендиязынче конкурс тиилекчизиниң дипломнарын дараазында студентилер алган:

- Ак-Довурактың даг техникумунуң сургуулу Кудерек Аялга Амуровна;
– Республиканың эмчи колледжизиниң сургуулу Монгуш Айлана Шораан-ооловна;
– Тываның политехниктиг техникумунуң сургуулу Монгуш Урансай Александровна;
– Тываның көдээ ажыл-агый техникумунуң сургуулу Сергеенко Кирилл Павлович;
– Тываның тудуг техникумунуң сургуулу Ооржак Чыжыргана Мергеновна;
– Тываның күрүне университединиң студентилери Монгуш Айрана Айбековна; Ондар Айбек Эресович; Ондар Радмила Алексеевна; Ондар Александр Андреевич; Чымба Чаян Алексеевич.

Ректор балы ийи дугаар чыл ачы-буян угланыышкынныг эртип турар. Оон чыгдынган акша-хөреңгини тускай шериг операциязының киржикчилерин деткииринче киириштирер.