Тывада коронавирустан аарыыры 60 хууга эвээжээн

Регион чазааның аппарат хуралында, Росхереглелхайгааралының ТР-де эргелелиниң даргазы Людмила Салчак Тывада эпидемиологтуг байдалдың талазы-биле дыңнадыгны Владислав Ховалыгга илеткээн.

Эрткен неделяның беш хонуунда, январьның 15-тен 19-ка чедир, COVID-19 аарыы 60 хуу эвээжээни демдеглеттинген. Улуг улустан 6 кижиде, 17 харга чедир уруглар аразында 4 кижиде чаа коронавирус халдавыры илереттинген. Чиик байдалдыг 4 кижини амбулаторлуг эмнээшкинде алган. Чыдар оруннар саны четчир.

Ооң-биле чергелештир ОРВИ база грипптен аарыыр чорук 9 хуу көвүдээн. Эрткен неделяда республикада 1240 кижи ОРВИ база грипптен аараан, оларның аразында 14 хар чедир назылыг 818 уруглар бар.

А Кызыл хоорайда ОРВИ база грипптен аарыыры эвээжээнин эмчилер демдеглээн. Чеди хонуктуң мониторингизинден көөрге, чүгле 354 аарыг кижи демдеглеттинген. 14 харга чедир 164 уруг аараан.

Республиканың кол санитар эмчизи эпидемиологтуг байдалды көргеш, Тываның өөредилге болгаш социал албан черлеринге халдавырны тарап нептеретпези-биле камгалал хемчеглерин хажыт чокка сагыырын сүмелээн.