Эрткен неделяда Тывага 3 баллдан күштүг дөрт чер шимчээшкини бүрүткеттинген

Эрткен неделяда Тывага 3 баллдан күштүг дөрт чер шимчээшкиннери болган. Ооң дугайында ОБЯ-ның регионалдыг эргелели республика чазааның аппарат хуралында дыңнаткан.

Январь 9-туң хүнүнде 06:48 шакта 4,3 балл күштүг бирги чер шимчээшкини демдеглеттинген. Ооң төвү Каа-Хем кожууннуң Үжеп-Аксы суурдан чөөн чүкче 117 километрге болган.
Январьның 11-де 07:09 шакта Тожу кожууннуң Адыр-Кежиг суурдан мурнуу-чөөн талаже 131 км-де черге 3,4 баллдыг ийиги силгиишкинни демдеглээн.
Январьның 12-де 14:43 шакта 3,1 магнитудалыг база бир силгиишкин Улуг-Хем кожууннуң Торгалыг суурдан мурнуу-чөөн талада 21 км-ге демдеглеттинген. Тере-Хөл кожууннуң Кунгуртуг суурдан 28 км-ге 4,2 балл күштүг чер шимчээшкини ол-ла хүннүң 22:46 шакта болган.

Ол дөрт силгиишкиннерниң эпитөвү 15 км ханы чер адаанга болганы демдеглеттинген. Ол чоок-кавында чурттакчылыг черлерден дыңнадыглар кирбээн. Чер шимчээшкиннери демдеглеттинген кожууннарда амыдырал-хандырылга объектилери штаттыг чурумда ажылдап турар, үрелиишкиннер болгаш когарааннар чок дээрзин ОБЯ дыңнаткан.

2023 чылда Тываның девискээринге 3 баллдан күштүг 53 чер шимчээшкиннери бүрүткеттинген. Олар Кызыл, Улуг-Хем, Эрзин, Каа-Хем, Тере-Хөл, Бай-Тайга, Чеди-Хөл, Тожу, Өвүр, Бии-Хем, Барыын-Хемчик база Мөңгүн-Тайга кожууннар девискээрлеринге болгулаан.