Владислав Ховалыг – Тываның күрүне эрге-чагырга органнары биле прокуратураның үре-түңнелдиг кады ажылдажылгазын үнелээр бис

Тыва Республиканың прокуратуразынга Россия Федерациязының прокуратуразының тургустунганындан бээр 302 чылынга тураскааткан байырлыг хурал болуп эрткен. Тыва Республиканың Баштыңы Владислав Ховалыг, Тыва Республиканың Дээди Хуралының (парламент) даргазы Каң-оол Даваа, прокуратура органнарының хоочуннары база амгы ажылдакчылары байырлалга киришкен.

«Тываның күрүне эрге-чагырга органнары биле прокуратураның үре-түңнелдиг кады ажылдажылгазын үнелээр бис. Сөөлгү эрткен ийи чылда чоруткан комплекстиг хемчеглер республикада кем-херек үүлгедиишкиннерин чавырылдырган. Аңаа улуг салдарны республиканың прокуратуразы ойнаан. Чаа үнген 2024 чыл бистиң чуртувуска төөгүлүг болуушкуннар-биле байлак. Чугула ниитилел-политиктиг хемчеглер эртер. Россия Федерациязының Президентизиниң соңгулдаларын, чылдың ийиги чартыында – республика парламентизиниң депутаттарының соңгулдаларын бедик деңнелге эрттирерин хандырар ужурлуг бис» - деп, Тываның Баштыңы Владислав Ховалыг чугаазында демдеглээн.

Юстицияның биче чөвүлекчизи, прокуратураның хоочуну Марина Кара-Хунаевна Укейге хөй чылдарда төлептиг ажыл албаны болгаш хоойлуну быжыглаарынга улуг үлүг-хуузу дээш Тыва Республиканың Өөрүп четтириишкин бижиин чарлаан. А юстицияның улуг чөвүлекчизи, прокуратураның хоочуну Амир Достей-оолович Монгушка Тыва Республиканың Баштыңының Хүндүлел бижиин тывыскан.
Тыва Республиканың прокурору, юстицияның 2 клазының күрүне чөвүлекчизи Сергей Дябкин Россия Федерациязының чиңгине прокурору Игорь Красновтуң дужаалы езугаар, прокуратураның ажылдакчыларынга болгаш хоочуннарынга шаңналдарны тывыскан. Оларның аразында «Россия прокуратуразының 300 чылы» юбилейлиг медаль база бар. Тыва Республиканың прокурору шаңналдар тывыскан бодунуң дужаалын чарлаан.

Байырлыг хуралда В. Тока аттыг симфониктиг оркестрниң солизи Экер Кара-Сал, В. Көк-оол аттыг национал хөгжүм-шии театрының артизи Салбак Лапчар, Тыва Республиканың прокуратура органнарының аныяк специалистери хөгжүмнүг байырын чедирген.