Тывада ОРВИ база грипп аарыы эпидемиологтуг деңнелден 21,9 хуу эвээш

Чаа чылдың бирги неделязында Тывада ОРВИ-ден аараан 608, а грипптиң А хевиринден – 5, COVID-19-тан 9 кижи аараан деп, Росхереглекчилер хайгааралының регионалдыг эргелели эпидемиологтуг байдалга неделяның мониторинг түңнелин республиканың баштыңы Владислав Ховалыгга таныштырган.

Хайгаарал ведомствозунуң удуртукчузу Людмила Салчактың дыңнатканы болза, эрткен неделяга деңнээрге ОРВИ база грипптен аарыыры 10 муң чурттакчыга онааштыр 14,3 турганындан, 18 чедир өскен. Өзүлде 26,1 хуу. Ындыг болзажок эпидемиологтуг деңнелден 21,9 хуу куду.

Назы-хар аайы-биле чамдык бөлүктерде ОРВИ база грипптен аарыыр чорук эвээш. 2 харга чедир өпеяларның аарыыры эпидемиологтуг деңнелден 40,3 хуу, 3-6 харлыг чаштарның 26,7 хуу, 7-14 харлыг элээдилерниң 43,3 хуу, 15 хардан өрү назылыг кижилерниң 44,9 хуу эвээш.

Бичии өпеялар болгаш улуг улус аразында халдавырлыг вирус аарыгларындан аарыыры неделяда 1,5 катап өскен.

COVID-19 талазы-биле эпидемиологтуг байдал ажырбас. Чаа чылдың бирги неделязында республикада чаа коронавирус инфекциязындан аараан 13 таварылга бүрүткеттинген – дөрт улуг кижиде база 17 хар чедир тос уругда. Ооң мурнунда неделяга деңнээрге, аарыыр чорук 71,1 хуу кызырылган.

ОРВИ база грипптен аараан 138 кижи байырлал хүннеринде эмнелгелерге чыдып эмнеткен. Эмнелгелерге чыттырган кижилерниң көвей кезии, азы 114 кижи – 14 харга чедир бичии уруглар. COVID-19 деп диагнозтуг 12 кижи эмнелгелерде, 29 кижи амбулаторияларда эмнедип турар.