Тываның Баштыңы «Россия 24» телеканалга интервьюзунда 2023 чылдың түңнелдерин таныштырган

Республика Баштыңы бүгү чуртта эң кол тема - тускай шериг операциязының киржикчилеринге көргүзүп турары деткимчезиниң база фронт чоогунда шериглерге ужуражылгаларының дугайында чугаадан эгелээн. Республиканың чазаа 55-ки дагжы мотоадыгжы бригадага «гвардейжи» деп хүндүлүг атты тыпсыр дилегни кииргенин Владислав Ховалыг дыңнаткан.

Ол ышкаш регионнуң социал-экономиктиг хөгжүлдезиниң дугайында база чугаалаан. Ылаңгыя национал төлевилелдер база федералдыг программалар-биле бистиң республикага көргүзүп турар күрүне детимчезиниң ачызында тудуг адыры шапкынчып, коммерциялыг болгаш комплекстиг тудуглар көвүдээнин демдеглеп, оон аңгыда Тывага чиигелделиг ипотека программазын узадыр планын дыңнаткан.

Регионда социал объектилер тудуун база чугаалашкан – 2023 чылда Тыва ниити өөредилге албан черлериниң тудуун каш катап көвүдеткеш, үш ээлчегге өөренирин чок кылган. Бо хүнде республикада 9 школа тудуу чоруп турар. 2 школаны ажыглалче кииеринге чөпшээрелди Чаа чыл бүдүүзүнде алган. 2 школаның тудуу доозулгалак. 2024 чылдың төнчүзүнге чедир артканнары ажыглалче кирер.

Республиканың баштыңы бүдүрүлге адырында чедиишкиннерин, чырык хандырылгазының комплекстиг планын күүсеткенин, чурттар аразының транспорт оруунуң төлевилелин ажылдап кылырының дугайында сонуургаткан. Интервьюнуң долу бижидилгезин моон көрүп болур: https://vk.com/gov.tuva?w=wall-34709566_64237.