Тываның Соок-Ирейи Луганск Улус Республиканың Свердловск хоорайда уругларга байырны чедирген

Амгы үеде ажыл-агый аайы-биле Луганск Улус Республиканың Свердловск хоорайда сургакчылап чоруп турар Тыва Республиканың Баштыңының ТШО айтырыгларның талазы-биле тускай төлээзи Тимур Куулар Чаа чылдың кол илбичизиниң ролюн күүсеткен.

Республиканың төлээлери Владислав Ховалыгның даалгазы езугаар, Чаа чыл бүдүүзүнде Свердловск хоорайның бичии чурттакчыларынга байырны чедирип, белек-селээн сөңнээн. 1200 ажыг свердловчу оолдар, уруглар белектерни алыр, ооң аразында «Күзелдер шивизи» бүгү-российжи акцияның дөрт бичии киржикчизиниң шагдагы күзелдерин Тываның Чазааның кежигүннери боттандырган.

- ТШО айтырыгларның талазы-биле мээң тускай төлээм Тимур Куулар Соок-Ирейниң ролюн бөгүн шенеди. Тулган болду! Тимур Борисович шефте алганывыс Луганск Улус Республиканың Свердловск муниципалдыг округунда уругларга чедип, бүгү Тываның өмүнээзинден белектерни сөңнээн. Сургакчылаашкынның өөрүнчүг кезээ ындыг – деп, Владислав Ховалыг свердловчу өг-бүлелерге Чаа чылдың белектерин үлээн тыва Соок-Ирей баштаан делегацияның видеозун тайылбырлаан.

Тимур Куулар уругларга болгаш «Күзелдер шивизи» бүгү-российжи акцияның киржикчилеринге белектер тыпсыр хүндүлүг хүлээлгени күүсеткен. Тываның Вице-премьер Айдын Чюдюк 8 харлыг Алешаның чадаг-тергелиг болуксаан күзелин, оралакчы дарга Виталий Бартына-Сады 14 харлыг Оляның “демир аът” күзээн күзелин боттандырып, тускай төлээден чоруткан. Уругларның чоок кижилери Сибирьден Соок-Ирей биле ооң командазын чылыы-биле уткуп, шүлүк, ырын бараалгаткан.

11 харлыг Соняның кылаштап турар ойнаар-кыс күзээн күзели, чурттуң культурлуг төвү – Санкт-Петербургка чедиксээн Даниланың күзели база боттанган. Вице-премьер Орлан Сарыглар онзагай ойнаар-кысты, а Тываның Баштыңы Владислав Ховалыг Нева хемде хоорайже аян-чоруктуң сертификадын чоруткан.

Свердловскыдан мөчээн шериг албанныгларның ажы-төлү, өскүс уруглар, муниципалдыг Культура бажыңының салым-чаяанныг оолдар, кыстары Тываның Баштыңындан Чаа чылдың белектерин алыр. Социал-реабилитация төвүнүң, Червонопартизанскының тускай школа-интернадының бичии кижизиттирикчилеринге, Бирюковонуң школа-интернадының өөреникчилеринге, Сведрловск школаларының тергиин өөредилгелиг болгаш активчи школачыларынга тыпсыр кылдыр 200 ажыг белектерни муниципалдыг округтуң өөредилге эргелелинге чедирген.

Тыва Республика Луганск Улус Республиканың Свердловск муниципалдыг округка шеф дузазын көргүзүп турар. Регион муниципалитеттиң инфраструктуразын катап тударынга дузаны көргүскен. Тываның тудугжулары бо чылын Свердловск хоорайның 6 дугаар школазының спортчу залын септеп берген. Тываның Өөредилге яамызы бо чайын свердловчу уругларга Ростов облазының Таганрог хоорайда «Золотая коса» кадыкшылга лагеринге дыштаныр 100 путевканы садып берген. Червонопартизанск хоорайда уруглар садын база бир свердловчу школаны септээринге шеф дузазын көргүзер планнаашкын база бар.