Кызылдан Москваже субсидиялыг авиарейстер январьда катап ужуп эгелээр

2024 чылдың бирги хонуктарындан эгелеп Тываның чурттакчылары Москваже чиигелделиг өртек-биле катап ужуп эгелээрлер.

«Кызыл - Москва - Кызыл» угланыышкынга чиигелделиг авиабилеттерни садып эгелээнин республиканың орук-транспорт комплекизиниң яамызы дыңнаткан. Январьның 2-де Кызылдың аэропортундан Домодедовоже субсидиялыг бирги рейс ужуп үнгеш, чиигелделиг билеттерлиг авиааргыжылганы катап эгелээр.

Чамдык бөлүктерниң хамаатыларын деткиири-биле чиигелделиг билеттерни киирген. 23 харга чедир аныяктар, 55 хардан өрү назылыг херээжен, 60 хардан өрү назылыг эр улус, инвалид уруглар, 1-ги бөлүктүң инвалидтери, хөй ажы-төлдүг өг-бүлелерниң кежиүгеннери ол чиигелдени ажыглаар эргелиг.

Неделяның понедельник, среда, пятница хүннеринде ужудар «Суперджет-100» самолеттуң бир талаже билединиң чиигелделиг өртээ 6100 рубль болур. Субсидиялыг билеттерни авиакассалардан база агентстволардан садып ап болур.

Республика найысылалындан Москваже рейстиң субсидия акша-хөреңгизин РФ-тиң Чазааның чогуур доктаалы езугаар чылдың-на федералдыг акшаландырыышкындан аңгылаар.

ТР-ниң Орук-транспорт яамызының медэзинден алырга, 2024 чылда чиигелделиг ужудуушкуннарны боттандырарынга Тываже 8 млн ажыг рубльди шилчиткен, амгы үеде регион федералдыг транспорт ведомствозу-биле кады келир чылда немелде акша-хөреңгини аңгылаарының талазы-биле ажылды чорудуп турар.