Тываның Баштыңының Ёлказы республиканың шупту кожууннарындан муң хире уругларны чыгган

В.Көк-оол аттыг Национал театрга республиканың Чаа чылдың кол оюн-тоглаазынче эки өөредилгелиг, интеллектуалдыг, эртем, чогаадылга болгаш спортчу чедиишкиннери-биле шылгараан база тускай шериг операциязында шериг даалгазын күүседип турар ачаларлыг муң хире уругларны хаара туткан.

Театрның артистери А.С. Пушкинниң «Салтан Хаан» деп тоолунга үндезилээн хөгжүмнүг шиини база «Соок-Ирей болгаш нейрочетки» деп шиви чанынга оюн-көргүзүү-биле бичии аалчыларның кичээнгейин алган.

Республиканың Баштыңы Владислав Ховалыг Москва хоорайже дарый сургакчылап чорупканындан, Чаа чыл бүдүүзүнде уругларга байырын боду чедирбээнин хараадал-биле дыңнаткан: - Бөгүн Тываның булуңнарындан муң хире уруглар, оолдарга Чаа чылдың байырлалын организастаан бис. Кел чыдар Чаа чыл-биле уругларга бодум ужуражып, байыр чедирбээнимге, дыка хомудадым. Москвада ажыл-херектер саадады берди. В.Көк-оол аттыг Национал театрга байырлал эки эрткенин меңээ дыңнатты. Чалаттырган уругларның чеди чүзү – тускай шериг операциязында киржип турар дайынчыларывыстың ажы-төлү. Оларның сагыш-сеткилинге байырлалды сөңнээри биске эң чугула – деп, регионнуң удуртукчузу бодунуң блогунда бижээн.

Республикада Чаа чылдың кол оюн-көргүзүүнче ыраккы Тере-Хөл, Мөңгүн-Тайга, Тожу кожууннардан дээш, шупту муниципалдыг тургузуглардан уругларны чалаан. Эң-не хөй төлээлер Кызыл хоорайдан болган.

Губернатор Чаа чылдың хемчээнде киржип келген уругларның айыыл чок чоруун хандырарынче онза кичээнгейни угландырган. Хоорайда келген уругларны аай-дедир аргыштырып, таарымчалыг байдалдарны тургузары-биле, уругларның делегацияларынга яамылар болгаш ведомство удуртукчуларын кураторлаар кылдыр быжыглаан.

«Соок-Ирей болгаш нейрочетки» көргүзүгнүң сценарийинде Соок-Ирей бир-ле компьютер программазынче кирип тургаш, угаанын чидирип алгаш, бодун Санта Клаус кылдыр санап, Чаа чылдың оюн-көргүзүүнче баарын безин уттуптар. Золушканың оглу программист Жан биле уруглар Соок-Ирейниң угааны эглип келиринге дузалажыр. Соок-Ирей-биле уйнуу Харжыгаш ооң соонда уруглар-биле шиви долгандыр ырлашкан соонда, отчугаштарны кыпсыптарга, Чаа чылдың илбичизи шупту чүвени сактып келир. Соок-Ирей орталанып келгеш, уругларга мөөрейлерни эрттирип, Чаа чылдың шүлүктерин дыңнаан.

- Бир дугаар бо утренникте келдим. Шии-даа, мөөрейлер-даа дыка солун-дур – деп, Кызылдан 10 харлыг Буяна чугаалаан.

Сабрина биле Айслан Биче-оолдар хөй ажы-төлдүг өг-бүледен. Чаа чылдың кол Елказының чанынга Соок-Ирей-биле ырлажып, кадыкшылды болгаш эки өөредилгени боттарынга болгаш чоок кижилеринге күзээн.

Сөөлгү үш чылдарда эки өөренген болгаш, муниципалдыг деңнелге шилилгени эрткен уруглар республика Баштыңының Елказынга киржир эргени чаалап алырын демдеглезе чогуур. Эрткен чылда ышкаш, бо чылын база, тускай шериг операция киржикчилериниң ажы-төлүнче, ол ышкаш амыдыралдың берге байдалынга таварышкан өг-бүлелерниң уруг-дарыынче онза кичээнгейни углаан.

Чаа чыл Елказының шупту киржикчилеринге белектерни үлээн.