Тываның Баштыңы «Спортчу элита-2023» спортчу байырлалында шылгараңгай спортчуларны шаңнаан

Декабрьның 23-те, «Субедей» спорт комплекизинге чылдың кол спортчу байырлалы - «Спортчу элита – 2023» хемчег болуп эрткен. Бо чылын чээрби алды дугаар эртип турары ол. Ол чылдарда Тываның 500 ажыг спортчулары болгаш тренерлери тергииннерниң тергииннери кылдыр санаттырып, ат-алдарны база шаңнал-макталдарны алган.

Тываның Баштыңы Владислав Ховалыг спортчу байырлалга киржип, республиканың спортчуларынга байырын чедирген.

Саян Хертек самбога делегей чемпионадынга чайынналчак чедиишкинни чедип алгаш, Начын Монгуш 23 харга чедир спортчулар аразынга хостуг хүрешке делегей чемпионадынга алдын медальды чаалап алгаш, Чингис Сарыглар биле Найыр Ооржак үш дакпыр олимпий чемпиону Буйвар Сайтиевтиң шаңналы дээш хостуг хүреш маргылдаазынга чемпионнааш, 2023 чылда Тыва спорттуң төөгүзүнче киир бижиттингенин демдеглээн. Бо чылын Кызылга болуп эрткен “Азия төвүнүң Кубогу” дээш эр мөгелер аразынга делегей чергелиг сумо маргылдаазынга тыва мөгелер киришкеш, 19 медальды чаалап алган.

Россия Федерациязының камгалал сайыдының Кубогу дээш шериг албанныглар аразынга спортчу хүрешке I делегей маргылдаазы патриотчу болгаш кижизидикчи хей-аътты берген деп, Тываның Баштыңы демдеглээн.

Республиканың 30 муң ажыг чурттакчыларын хаара тудуп, муниципалдыг тургузугларда чоннуң аңгы-аңгы бөлүктериниң аразынга болуп эрткен Тыва Республиканың I чайгы спартакиадазы – 2023 чылдың эң улуг спортчу болуушкуну кылдыр демдеглеттинген.

Республиканың спорт школаларының чедиишкиннерин көргүскен спортчу шуулган Тывага бир дугаар болуп эрткен. Школаларның кижизиттирикчилери бүгү-российжи болгаш делегей база республика маргылдааларынга чедип алган үре-түңнелдерин таныштырып, кубоктарын болгаш медальдарын делгээн.

«Ийи кижиниң спортчу оюннарынга база уран гимнастикага уруглар болгаш элээдилерниң көргүзүглери хөйнү магадаткан. Бөмбүктү октап, боодан кара адып турганым школачы болгаш студент үелеримни шуулган үезинде сагындым. Спорттуң национал хевирлери – хүрештен шыдыраага чедир оюннарны уттуп болбас» - деп, Владислав Ховалыг бижээн.

Республикада спорт болгаш күш-культураның хөгжүлдезинге киирген улуг үлүг-хуузу дээш тренерлерге болгаш спортчуларга күрүне шаңналдарын база аттарны тывыскан. Делегей ареназынга онза шылгараан тыва спортчуларга акша шаңналдарын тывыскан.

Самбога делегейниң үш дакпыр чемпиону Саян Хертекти «Тыва Республиканың мурнунга ачы-хавыяазы дээш» медаль-биле шаңнаан.

Тыва Республиканың Чаан мөгези, сумога делегей чергелиг спорт мастери Сайын-Белек Тюлюшке спортчу бедик чедиишкиннери дээш чурттаар бажың садып азы тудуп алыр кылдыр үш миллионнуң сертификадын Тыва Республиканың Чазааның мурнундан тывыскан.

24 харга чедир спортчулар аразынга делегей чемпиону Начын Монгуш бир миллионнуң сертификадынга төлептиг болган.

Европаның бирги чери дээш хостуг хүреш чемпиону Чингис Сарыгларга 70 муң рубльдиң сертифкадын тывыскан.

18 харга чедир мөгелер аразынга делегейниң хүлер медалының эдилекчизи Тана Тюлюшке 50 муң рубльдиң сертификадын тывыскан.

Күш-культура болгаш спорт адырында сес шылгараңгай ажылдакчыларны күш-культура болгаш спортту хөгжүдеринге киирген улуг үлүг-хуузу дээш күш-культура болгаш спорт адырында күрүне эргелеп-башкарылга органының тургустунганындан бээр 100 чылынга тураскааткан юбилейлиг медальдар-биле шаңнаан.

Россия Федерациязының спорт сайыдының Өөрүп четтириишкин бижиинге беш кижи төлептиг болган.

Ак-Довурак хоорайның спорт школазының башкылары - тренер Валерий Донгак, кикбоксинги тренери Мөңгүн-оол Иргит, волейбол тренери Сагандай Монгуш оларга "Тыва Республиканың алдарлыг тренерлери" аттарны тывыскан.

Тыва хүрешке эң шыырак дөрт мөгениң санынче кирген спортчу Эртине Хомушку бедик спортчу чедиишкиннери дээш «ТР-ниң Хартыга мөгези» хүндүлүг атты алган.

Тыва хүрешке эң шыырак сес мөгениң санынче кирген спортчу Айран Ижиге «ТР-ниң Начын мөгези» хүндүлүг атты тывыскан.

Тыва хүрешке эң шыырак сес мөгениң санынче кирген спортчу Субудай Шойдун «ТР-ниң Начын мөгези» хүндүлүг атты алган.