Тываның Баштыңы Владислав Ховалыг «Күзелдер Шивизи» бүгү-российжи ачы-буян акциязынга каттышкан

Тываның Баштыңы Владислав Ховалыг чаагай чаңчыл езугаар «Күзелдер Шивизи» акцияга каттышкан. Чазак Бажыңында каастаан Чаа чылдың Шивизинден Сайын-Белек, Алиша база Асельдиң эң-не боттандырыксаан күзелдерин бижээн үш шарны тырттып алган. Республика Баштыңының соонда күүсекчи эрге-чагырганың девискээр органнарының, республика яамылары база ведомстволарының удуртукчулары Чаа чылдың ойнаарактарын тырткан.

Ачы-дуза акциязы өскүс уругларның, кадыкшыл байдалы кызыгаарлыг уругларның, хөй ажы-төлдүг өг-бүлелер уругларының база ТШО киржикчилери – шериг албанныгларның база мөөңнээшкин-биле кыйгыртканнарның ажы-төлүнүң күзелдерин боттандырар. Сайыттар, эрге-хоойлу тургузугларның удуртукчулары, депутаттар болгаш өске-даа энерел сеткилдиг кижилер уругларның күзелдерин боттандырарынга үлүүн киирерлер.

«Күзелдер Шивизи» акцияны Баштайгыларның шимчээшкини удуртуп башкарып турарын демдеглээлиңер. Активчилер Иван Кукарин биле Менги Куулар уругларның күзелдерин канчаар чыгганын, оларны күүседир хуусааларының дугайында республика баштыңынга чугаалааннар.

Тываның Баштыңының шилип тырткан уругларның солун чүвези, олар шупту тос харлыг болган. Сайын-Белек шериг кезээн сонуургаан, Асель “наушниктер” күзээн чажыттарын, а Алиша регион Баштыңындан тывызыксыг белекти манап турарын бижээн. Маңаа уругнуң сонуургалдарын, чедиишкиннерин өөренип көөр херек деп демдеглээн. Тываның Баштыңы уругларның күзелдери үнүп олурар Чаа чылдың бүдүүзүнде боттаны бээрин аазаан.

Культура сайыды Виктор Чигжит синтезатор күзеп турар 10 харлыг Аинаның чагыын тырттып алган. Аныяктар херектериниң талазы-биле агентилелдиң даргазы Буян Сонам шагда-ла чадаг-тергелиг болуксаан 4 харлыг Денберелдиң күзелин боттандырар.

Тываның шериг комиссары Демир-оол Артына ыраккы Мөңгүн-Тайганың Кызыл-Хая суурундан От-Суренниң акустикалыг гитара алыксаан күзелин шилип алган. Шериг комиссары Чаа чылдың белээ үе-шаанда чеде бээрин дыңнаткан. А көдээ ажыл-агый сайыдының албан-хүлээлгезин күүседип турар Юрий Оруспай база-ла тывызыксыг белек манаан 7 харлыг Каң-Болаттың күзелин тырткан.

12 харлыг Аюша Тываның иштики херектер яамызының бажыңын сонуургаан күзели душ бооп Тыва Республикада иштики херектер сайыды, полицияның генерал-майору Сергей Кондрашовка таварышкан.

Россияның федералдыг айыыл чок албанының Кызыгаар эргелелиниң начальниги Владимир Матвеев Таңдыдан 12 харлыг Долзатка чадаг-тергени, Росгвардияның Тыва Республикада эргелелиниң начальниги Александр Новосёлов 5 харлыг Даримага белекти чедирерлер.

«Тывада акцияның ажылын дүүштүрүп турар «Баштайгыларның шимчээшкининиң» активчилери Иван база Менги-биле таныжып алдым. Эр-хейлер! Бүгү-российжи ачы-буян төлевилелин идепкейлиг деткип, бистиң ажы-төлүвүстүң ыдык күзелдерин амыдыралга ботандырарынга чылдың-на киржип турар кижилерниң шуптузунга четтиргеним илереттим» – деп, Владислав Ховалыг демдеглээн.

«Мээң-биле кады күзе» деп бүгү-российжи ачы-буян төлевилелиниң «Күзелдер Шивизи» акциязы 2018 чылдан бээр бүгү Россияның девискээринде боттанып турарын сагындыраал. Амыдыралдың берге байдалынга таварышкан уругларга өөрүшкүнү сөңнеп, тоолчургу Чаа чылды көргүзери – акцияның сорулгазы.