Тываның Баштыңы айыыл чок чорук органнарының ажылдакчыларынга күрүне шаңналдарын тывыскан

Владислав Ховалыг республиканың айыыл чок органнарының ажылдакчыларынга болгаш хоочуннарынга профессионал байырлалы-биле байырын чедирген. Полковник Владлен Мельниковтуң баштааны Россияның федералдыг айыыл чок албанының Тыва Республикада эргелелиниң хуу составынга чаа чедиишкиннерни, быжыг кадыкшылды болгаш аас-кежикти күзеп, шылгараңгай офицерлерге күрүне шаңналдарын тывыскан.

Владислав Ховалыг амгы үеде даштыкыдан геополитиктиг кыжаныглар үезинде тускай албаннарданың талазындан бедик профессионал ажыл чүден херегин демдеглеп, республика девискээринде айыыл чок чорукту болгаш турум байдалды хандырарынга үлүг-хуузу, дээштиг кады ажылдажылгазы дээш эргелелдиң хуу составынга четтиргенин илереткен. ФАА-ның дыка хөй ажылдакчылары ТШО зоназында, чурттуң чаа регионнарында дайынчы байдалдарда боттарның хүлээлгезин төлептиг күүседип турар.

Айыыл чок органнарында ажыл-албанын хөй чылдарда сыныш чок күүседип чорууру база республикада корум-чурумну база хоойлужудулганы бажыглаар адырда ачы-хавыяазы дээш, Россияның ФАА Тыва Республикада эргелелиниң килдис начальнигин “Тыва Республиканың мурнунга ачы-хавыяазы дээш” деп Тыва Республиканың медалы-биле шаңнаан.

Россияның ФАА Тыва Республикада эргелелиниң начальнигиниң дузалакчызы хөй чылдарда төлептиг албаны, бедик профессионал чедиишкиннери дээш Тыва Республиканың Баштыңының Хүндүлел бижиинге төлептиг болган.

Хөй чылдарда төлептиг албаны, бедик профессионал чедиишкиннери дээш Тыва Республиканың Баштыңының Өөрүп четтириишкинин Россияның ФАА Тыва Республикада эргелелиниң аппарат офицеринге чарлаан.