Тываның Баштыңы 2024 чылда республика бюджединиң дугайында хоойлуга атты салган

ТР-ниң Дээди Хуралынга, 2024 чылда Тыва Республиканың Бюджет дугайында хоойлузун сөөлгү номчулгазында бадылаан соонда, Владислав Ховалыг документиге атты салган. Бюджет хоойлужудулгазының негелдези езугаар кол саң-хөө нормативтиг актызынга ажык дыңнаашкыннарны чорудуп, тыва парламентиниң тускай комитеттеринге сайгарган.

Тываның Баштыңы социал четкилерге атты салганын дыңнадып тура, эрткен чылда ышкаш бюджет социал угланыышкынныг артканын демдеглээн. 56,6 млрд рубль бюджеттиң 73 хуузу чарыгдалдарже, азы 44,3 млрд рубли республика эрге-чагыргазының социал хүлээлгелер күүселдезинче угланган:

- Келир чылда хөй-ниити транспортун, орук, коммунал база көдээ ажыл-агый техниказын чоорту чаартырын, социал албан черлерин бүрүнү-биле септеп-селиирин, "Сорунза", "Арыг хоорай", "Мээң башкым" губернатор төлевилелдерин боттандырарын база өске-даа ажыл-чорудулганы уламчылаар бис – деп, республиканың удуртукчузу демдеглээн.

Декабрьның 13-те эрткен бо чылдың сөөлгү күскү сессиязында, депутаттар 2024 чылда Тыва Республиканың Бюджедин бадылаан. Тываның саң-хөө сайыды Орлан Достай кол саң-хөө документизиниң кол чүүлдериниң дугайында парламентарийлерге илеткээн.

Депутаттар тоску сессияның ээлчеглиг бешки хуралының түңнелдери-биле 2024 чылда Тыва Республиканың бюджедин 56 млрд. 138 млн. рубль орулгаларлыг, 56 млрд. 567 млн. рубль чарыгдалдарлыг кылдыр чаңгыс үн-биле бадылаан. Бюджеттиң чедишпес түңү - 429 млн. рубль.

«2024 чылда база планныг 2025 биле 2026 чылдарда Тыва Республиканың республика бюджединиң дугайында» ТР-ниң Хоойлузун республика Чазааның албан езунуң порталында «Тыва Республиканың Бюджеди» кезектен таныжып болур, ол ышкаш нормативтиг-эрге-хоойлу актызының тыва дылда очулгазын база салган.