Тыва Республиканың алдарлыг ажылдакчызы, күрүне албанының хоочуну Степан Монгушович Достай чок болган

Тыва Республиканың Баштыңы база Тыва Республиканың Чазааның кежигүннери Тыва Республиканың алдарлыг ажылдакчызы, күш-ажылдың хоочуну Достай Степан Монгушовичиниң мөчээни-биле ооң өг-бүлезинге, чоок кижилеринге ханы кажыыдалын илереткен. Степан Монгушович хой чылдарда ак сеткилдиг күш-ажылы-биле республиканың күрүне эрге-чагырга органнарының болгаш тус чер бот-башкарылга органнарының хөгжүлдезинге улуг үлүүн киирген.

Достай Степан Монгушович 1949 чылдың май 9-та Өвүр кожууннуң Солчур сумузунга төрүттүнген.

1966 чылда Хандагайты ортумак школазын дооскаш, “Коммунизмче орук” колхозунга учетчиктеп, хову бригадазынга бригадирлеп күш-ажылчы базымын эгелээн. 1974 чылда Красноярскиниң көдээ ажыл-агый академиязының ветеринария салбырын, 1980 чылда Новосибирскиниң партияның дээди школазын дооскан. Көдээ ажыл-агый эртемнериниң кандидады аттың эдилекчизи.

1974-1987 чылдарда Өвүр кожууннуң комсомол райкомунуң секретарынга, көдээ ажыл-агый эргелелиниң даргазынга, кожуун даргазынга ажылдаан. 1987-1992 чылдарда Тес-Хем кожууннуң кожуун даргалап, СЭКП Тес-Хем райкомунуң бирги секретарынга ажылдавышаан, улус депутаттарының район совединиң даргазының хүлээлгезин катай күүседип турган. 1992-1997 чылдарда Кызыл кожууннуң чагырга даргазының оралакчызынга ажылдаан. 1997-2000 чылдарда Тыва Республиканың Чазааның даргазының агроүлетпүр комплекизиниң айтырыгларын харыылаар оралакчызынга, көдээ ажыл-агый сайыдынга, ветеринария департаментизиниң даргазынга ажылдаан.

2012-2016 чылдарда Кызыл кожууннуң Баштыңы-Төлээлекичлер хуралының даргазынга ажылдап тура, “Кызыл кожуун” муниципалдыг районнуң сүлдезин, тугун Россия Федерациязының Геральдика Чөвүлелинге бадылаткан.

2013 чылдан Тыва Республиканың муниципалдыг тургузуглар ассоциациязының даргазынга ажылдаан. Өвүр, Тес-Хем район совединиң депутадынга хөй удаа, Тыва Республиканың чедиги чыыжының депутадынга соңгудуп чораан. 

Степан Монгушевич өөнүң ишти Билчеймаа Бады-Белековна-биле республикада хүндүлүг кижилер апарган төлептиг ажы-төлдерни кижизиткен.

Степан Монгушевич төрээн чериниң күрүне институдун хөгжүткени дээш хөй санныг ведомство болгаш күрүне шаңнал-макталдары-биле шаңнаткан. Тыва Республиканың алдарлыг ажылдакчызы, «Россия биле Тываның демнежилгезиниң 100 чылы база Кызыл хоорайның тургустунганының 100 чылы» юбилейлиг медальдың эдилекчизи.