Тывада чолаачыларга база оларның пассажирлеринге чылынар 10 пунктуну организастаан

Чамдык кожууннарда агаарның соогу 49 чедип турар чыкылама сооктар дүшкенинден, Орук-транспорт комплекизи база орук организациялары республика девискээринде хондур-хүнзедир ажылдаар стационарлыг болгаш шимчеп чоруур чылынар черлерни организастаан. Федералдыг болгаш регионалдыг автооруктар дургаар пунктуларны чолаачыларга база оларның пассажирлеринге дээш кылган.

Республиканың Орук-транспорт яамызы бөгүнде 10 вахта сууржугажын ажыдып, ажылдатканын дыңнаткан. Оларның бежи регионалдыг оруктарда: «Сотый» арттында («Абакан – Ак-Довурак» автооруктуң 316-гы км), «Тээли» арттында («Хандагайты – Ак-Чыраа» автооруктуң 58-ки км), «Мюн» арттында («Бояровка – Тоора-Хем» автооруктуң 104-кү км), «Бүрен-Аксы – Элегес-Аксы – Кунгуртуг» автотурлагда база «Бүрен-Аксы – Элегес-Аксы – Кунгуртуг» автооруктуң 32-ги км-де «Бельбей» деп черде дош кежигде оларны организастаан.

«Енисей» Р-257 федералдыг орукта “Восток” КХН орук организациязының баазазында чылынар беш вахта сууржугаштарын ажылдаткан: 729-ку км-де (Туран), 803-кү км (Кызыл), 913-кү км (Шагаан-Арыг), 1026-гы км (Чадаана), база 1078-ки км-де арт кырында (Хандагайты).

Синоптиктерниң баш бурунгаар дыңнатканы-биле алырга, республика девискээринге ажыг сооктар декабрьның 16-га чедир үргүлчүлээр, ол хүннерде агаарның ортумак температуразы климаттыг нормадан 12 градус база оон-даа соок болур чадапчок.

Ылаңгыя кежээки үеде узун оруктарже үнмезин чолаачыларга сүмелеп турар. Бир эвес аргажок орук чоруур апарза, автомобилин эки хынап, орук ара чылынар болгаш чемненир пунктуларның турар черин тодарадып алыры артык эвес. Оон аңгыда машинаңарда бирги дузаның эргежок херек чүүлдери (аптечка, өрт өжүрер херексел, аварийлиг доктаашкын демдээ, трос, дүлгүүрлер, артык дугуй) барын хынап, изиг суксун база чем, чылыг хеп, чылынар чүүлдерден ап алыңар.

Орукка берге байдалга таварышсыңарза, «Тываавтодор» ККА-ның 8(394-22)2-11-08 дугаарда диспетчери-биле харылзажып, Р-257 орукта - 8(394-22)2-99-09 телефонче долгаар. Ол ийи дугаарлар хондур-хүнзедир ажылдап турар. Онза байдал албанын кыйгыртыр телефоннуң дугаары – 112.