Тывада шупту дош кежиглер декабрьның 15-тен ажылдап эгелээр

Тывада республиканың чедери берге черлери-биле автомобиль аргыжылгазын хандырып турар дөрт дош кежиг бо неделяда ажыттынар. ТР-ниң орук-транспорт комплекизиниң сайыды Шораан Чыргал-оол ооң дугайында республика Баштыңы Владислав Ховалыгга дыңнаткан.

Тере-Хөл кожуунче чүгле чаңгыс орукта "Сарыг-Сеп – Кунгуртуг" автотурлаг декабрь 1-ге чедир кызыгаарлаттынган чурумга ажылдап турганын сайыт чугаалаан. Декабрь эгезинде республикада калбаа-биле 35-45 чедир дыңзып келген сооктар арткан үш маршуртта кежиглерни ажыдар арганы берген.

Декабрь 15-те Каа-Хем хемни кежир "Сарыг-Сеп – Балгазын" кежиглеп шимчээшкин ажыттынар. Ол кожуун төвү-биле дөрт суурнуң аразында орук 2,4 муң хире чурттакчының чоруун каш катап кыскаладыр. 700 кижи чурттап турар суурну “улуг чер”-биле харылзаштырган Улуг-Хемни кежир "Шагаан-Арыг – Эйлиг-Хем" кежии апрельге чедир ажылдаар.

Тоора-Хем суурдан Ак-Суг деп черге чедир Хамсыра хемни кежир база бир дош кежигни белеткеп турар. Ак-Сугда чес-профир чыдынында даг-болбаазырадылга комбинадының тудуунга ол орук дыка херек. Оон тудуг материалдарын, техниканы, дериг-херекселдерни, кывар-чаар материалдарны ынаар дажып сөөртүр.

Республика девискээринде Качык, Тоора-Хем база Кунгуртуг чедер орукта үш автотурлаг ноябрьдан апрельге чедир ажылдаар. Чер кыры-биле оон өскээр аргыжар аргазы чок чурттакчыларга кышкы турлаглар болгаш кежиглер амыдыралдың езулуг оруктары апаар. Кунгуртугнуң оруу - эң узун болгаш берге, 253 километр хире хемчээлге кижи чок тайгалап, даглыг хемнерни кежип чорааш чедер.