Тываның Баштыңы Хову-Аксы суурда газ частыышкынындан когараан өг-бүлеге дузалажырын дааскан

Бөгүн, 10.54-те, Чеди-Хөл кожууннуң ЧДДА дежурныйның телефонунче Хову-Аксы суурнуң Юбилейная кудумчузунда, 3 дугаар бажыңның бир квартиразында частыышкын болган дугайында дыңнадыг кирген.

 Кожазында бажыңның чурттакчызы, ол квартираның соңгалары ушта тепкен турарын көрүп каанын, дыңнаткан. Келген «дүрген дуза» бригадазы бажыңның ээзи, 1989 чылда төрүттүнген эр кижи кырызы чиик өртеңнерни алганын демдеглеп, ЧДДА-же дыңнаткан. Бажыңга турган дөрт бичии кижиге эмчи дузазы хереглеттинмээн. Оларның шуптузунга психологитуг дузаны көргүскен.

Республика Баштыңы Владислав Ховалыг болган болуушкунга хамаарыштыр өг-бүлеге дуза көргүзер ажылдарны дүүштүрер даалганы бодунуң оралакчызы Виталий Бартына-Садыда берген. Чурттакчы чон ортузунга газ дериг-херекселин шын ажыглаарының талазы-биле тайылбыр ажылын күштелдирерин чугаалаан.

Чеди-Хөл кожуун чагыргазынга онза байдалдар талазы-биле комиссияның ээлчег чок хуралын чыгган. Баш бурунгаар билдингени болза, бажыңда газ суугузунуң шын эвес коштунганындан газ үнгеш, частыышкынны болдурган. Амгы үеде чагырганың ажылчын бөлүү хөй аалдыг бажыңнарны кезип, ындыг үрелиишкиннерни илередир дээш хыналдаларны чорудуп турар. Хөй аалдыг бо бажыңны үш чыл бурунгаар ажыглалче киирген.

Квартирада үрелиишкиннерни чайлаткыже, уруглары-биле иези ол-ла суурда чер бажыңынга турарын, кожуун чагыргазы дыңнаткан.