Тываның Чазаа биле «Эльбрусметалл-Литий» (Ростех) социал-экономиктиг кады ажылдажылга дугайында дугуржулгага атты салырлар

«Ростех» инвестиция блок база ооң иштинде «Эльбрусметалл-Литий» структураның удуртулгазы-биле Владислав Ховалыгның ужуражылгазының кол айтырыы – чаа бүдүрүлгеже тус черниң кадрларын хаара тудары болган.

Компания бо чылдың октябрьда Эрзин кожуунда Тастыг чыдынын шиңгээдиринге аукционну ойнап алган. Инвесторлар кыска хуусаада бүдүрүлгени организастаптарын санаан. Баш бурунгаар санаашкыннардан алырга, республикага муң ажыг ажылчын олуттарны, беш чүс хире холушкак адырларны ажыдар.

«Аргалыг-ла болза чеже специалистер херегин дүрген билип алырынга сонуургалдыг бис. Ынчан аңаа херек кадрларны тускай белеткээр үе биске тыпты бээр» - деп, Тываның Баштыңы ужуражылга соонда социал четкилерде бодунуң арынында бижээн.

Тывада литий чыдынын шиңгээдир төлевилелди 30 чылда санаан болзажок, 20 чылдың лицензиязын алдывыс. Тастыгда стратегтиг металлдың курлавыры 600 хире муң тонна хире бар. Ол ышкаш ооң чыдынында ак-коргулчун, ниобий пентоксиди база тантал база бар. Чуртка база республикага төлевилел боттандырылгазындан ниити бюджет магадылалы 336 млрд рубль болур.

«Ростех» күрүне корпорациязының инвестиция блогунуң директорнуң оралакчызы Андрей Захаров регионнуң социал-экономиктиг төлевилелдеринге киржир бодалдыын республиканың удуртулгазынга дыңнаткан. Ооң дугайында чогуур дугуржулга белеткеттинген база бо чоокку үеде ат салдынар.

Тыва келир үениң бүдүрүлгезинче эң таарымчалыг орукту айтырынга деткимчени көргүзер. Ук чыдын Эрзин кожууннуң эң ырак боорда, чедери берге черде. Тус черниң орук-тудуг компаниялары тудуушкун ажылдарын ойнап алыр аргазы улуг деп, Владислав Ховалыг ужуралжылга үезинде демдеглээн. Компания регион-биле кады чырык хандырылгазының бүдүрүлге айтырыын шиитпирлеп, ону боттандырар.