Тывада Рождество номчулгаларынга киржир күзелдиг шупту кижилерни чалаан

Чаңчыл болу берген Тываның Рождество номчулгалары Кызылга он дугаар болуп эртер. Бо удаада номчулгалар «Православие болгаш ада-чурттуң культуразы: эрткен үениң чидириглери болгаш чедиишкиннери, келир үениң ову-хевири» деп темага эртерин республиканың Националдар херектериниң талазы-биле агентилел дыңнаткан.

Номчулгалар үезинде Орус Православ Хүрээниң Кызыл епархиязының төлээлери база ТывКУ-нуң студентилери илеткелдерни кылыр. Өг-бүледе база школа назылыг бичии уругларның шажын-мөзү-бүдүш кижизидилгезиниң, школага эр-кыс кижизидилге кичээлдериниң, кичээлден дашкаар үеде этнокультурлуг билиглерни хевирлээриниң дугайында  чугула айтырыгларга илеткелдерни кылыр.

Рождество номчулгаларының регионалдыг чадазының куратору иеромонах Амвросий (Громов) киржикчилерге сертификаттарны тыпсып, 2023 чылда Тыва Республиканың ниити өөредилге организацияларының аразынга «Башкының мөзү-бүдүштүг маадырлыг чоруу дээш» деп педагогика, кижизидилге, уруглар болгаш аныяктар-биле ажыл адырында бүгү-российжи конкурстуң регионалдыг чадазының тиилекчилерин шаңнаар.

Ниитилелдиң православ өөредилгезин, шажынчы-мөзү-бүдүш чырыдыышкынын хөгжүдериниң, православ өртемчей көрүүшкүнү-биле эртем болгаш культура айтырыгларын угаап бодаарының, ол ышкаш өөредилге адырында хүрээ-хиит биле күрүнениң кады ажылдажылгазын калбартырының чугула айтырыглары номчулгаже кирген.

Декабрьның 12-де Тываның күрүне университединиң кол корпузунга номчулгалар 11 шакта эгелээр. Кирери хостуг, сонуургалдыг кижилер номчулгаларны дыңнап болур.