Ада-чурт Маадырларының хүнүнде Тывада билдинмес солдаттың тураскаалынга чечектерни салган

Бөгүн, Россияда Ада-чурт Маадырларының хүнүнде, Тываның баштыңы Владислав Ховалыг база Россияның кадык камгалал сайыды Михаил Мурашко, республиканың Дээди Хуралының (парламент) депутаттары, корум-чурум камгалаар болгаш шеригжиткен албан черлериниң ажылдакчылары Кызыл хоорайда Билдинмес солдаттың тураскаалынга чечектерни салган.

Ада-чурттуң Маадырларның хүнү Россияның төөгүзү-биле быжыг доңнатттынган. Төрээн чуртунга кызыгаар чок бердингенин бодунуң ажыл-херектери, маадырлыг чоруктары база амы-тынын берип бадыткаан таварылгаларны бөгүн база катап сактып, демдеглээри чаңчыл апарган. Бөгүн тускай шериг операциязы чоруп турар үеде Маадырның хүнүнде эрес-дидим маадырларны адап, сактып демдеглээри бир онза ужур-уткалыг. Бистиң үениң Маадырларының аттарын болгаш оларның маадырлыг чоруктарын бүдүн чурт билир.

Республиканың баштыңы Владислав Ховалыг ооң дугайында бодунуң блогунда дыңнаткан. Солдаттарның маадырлыг чоруктары бистиң Төрээн чуртувустуң дайынчы алдарның төөгүзүнде киир бижиттинген деп, Тываның баштыңы езулал үезинде демдеглээн.

«Россияның Маадырлары Сергей Кужугетович Шойгу, Мерген Очур-оолович Донгак – төрээн чуртунга ынакшылдың болгаш бердиниишкинниң эң көскү чижектери-дир. Россияның маадырлыг эрткен үезиниң эң-не эки езу-чаңчылдарын уламчылап, чурттуң национал бот-догуннаашкыны, ажы-төлүвүстүң хостуг келир үези дээш тулчуп чоруур Ада-чурттуң камгалакчыларынга, российжи армияның шериг албанныгларынга база эки турачыларга чоргаарланып чоруур бис» - деп, Владислав Ховалыг демдеглээн.