Михаил Мурашко Тываның эмчилеринге ведомство шаңналдарын тывыскан

Россия Федерациязының кадык камгалал сайыды Михаил Мурашко Тыва Республикага кээп чорааш, хөй чылдарда профессонал хүлээлгезин ак сеткилдиг күүсеткен кадык камгалал адырының ажылдакчыларынга ведомство шаңналдарын тывыскан. Байырлыг езулал Тываның Чазаанга регионнуң баштыңы Владислав Ховалыгның база российжи башкарыкчы медицина албан черлериниң удутукчуларның киржкилгези-биле  болуп эрткен.

Михаил Мурашко ведомство шаңналдарын тыпсып тура, кадык камгалал адырының специалистеринге четтиргенин илереткен. “Хөй чылдарда бистиң адырывыстың мурнуку одуруунда бодунуң херээниң мастерлери, мерген дагдыныкчылары болбушаан, бедик мергежилиңерни база шылгараңгай ажылыңарны көргүзүп чоруур силер” – деп, сайыт демдеглээн.        

Тыва Республиканың кадык камгалал  адырынга хөй чылдарда ак сеткилдиг күш-ажылы болгаш бедик чедиишкиннери дээш «Кадык камгалалының тергиини» хөрек демдээн дараазында ажылдакчыларга тывыскан:

Республиканың 1 дугаар эмнелгезиниң  кезер эмчи сестразы Темир-оол Жанна Сергеевнага;

 Республиканың кеш-шээр аарыглар диспансериниң улуг фельдшери Медведева Ирина Васильевнага;

Республиканың онкология диспансериниң лаборант фельдшери Нордуп Розалия Сюрюновнага;

Тес-Хемниң төп кожуун эмнелгезиниң терапевт эмчизи Оюн-оол Лоозанмаа Мария Бижековнага;

Республиканың уругларның кадыкшылга медициназы база   реабилитация төвүнүң педиатр эмчизи Кадыр-оол Алимаа Сергеевнага;

Халдавырлыг ааргылар эмнелгезиниң эргелекчизи Монгуш Марианна Константиновнага.

Россияның кадык камгалал сайыдының бодундан Россия Федерациязының Кадык камгалал яамызының Хүндүлел бижиин Тыва Республиканың кадык камгалал  адырынга хөй чылдарда ак сеткилдиг күш-ажылы дээш дараазында ажылдакчылар алган:

Бии-Хемниң төп кожуун эмнелгезиниң терапевт эмчизи Шишова Ирина Евгеньевна;

Бии-Хемниң төп кожуун эмнелгезиниң лаборант фельдшери Лясовская Наталья Юрьевна,

Республиканың 1 дугаар эмнелгезиниң бичии уруглар кезер эмчизи Саая Чойгана Дамбаевна;

Республиканың онкология диспансериниң эмчи сестразы Куулар Роланда Боняевна;

Республиканың консультативтиг-диагностика төвүнүң эмчи сестразы Куулар Уянмаа Билзей-ооловна;

дүрген эмчи дузазының эмчизи Капустин Антон Андреевич.

Республиканың 1 дугаар эмнелгезиниң уруглар кезер эмчизи Чойгана Саая бодунуң үезинде Кемеровонуң медицина институдун дооскаш, республиканың башкарыкчы эмнелге албан черинге ажылдап эгелээн.  Оон бээр-ле Тываның бичии уругларның кадыкшылы дээш ажылдап чоруур. Эмчи он-он чылдарда аңаа эргим апарган коллективин оркестр-биле дөмейлээн:

- Бистиң эмнелгевистиң салбыр бүрүзү оркестрниң кезээ ышкаш, демниг болгаш чарлып болбас тудуш. Бистиң чаштарывыстың кадыы дээш дүн-хүн дивейн салбырывста ажылдап турар бис. Мээң бөдүүн күш-ажылымны бедии-биле үнелээни дээш, сеткилим ханызындан четтиргеним илереттим.