Россияның кадык камгалал сайыды Михаил Мурашко ажыл албан аайы-биле Тывада чедип келген

Регионнуң Баштыңы Владислав Ховалыг Михаил Мурашкону Кызылдың аэропортунга уткуп алган.

Федералдыг сайыт «Кадык камгалалы» национал төлевилелдиң күүселдезинде республиканың кадык камгалал объектилериниң эмчи дериг-херекселдери-биле четчелеттингенин хынап, эмнелге организацияларының коллективтериниң амгы айтырыгларын чугаалажып ужуражыр. Ол ышкаш эмнелге албан черлеринде чыдар аарыг кижилер-биле чугаалажып, республиканың эмчи колледжизиниң сургуулдарынга ужуражыр.

- РФ-тиң Кадык камгалал яамызындан штаттан дашкаар специалистер кирген бедик мергежилдиг команда бистиң эмнелгелеривистиң эмчилери-биле кады ажылдаар. Сайыт онза кичээнгейни ие-чаштарже угландырар, чаштарның төрүттүнери хөй республикага ол чугула – деп, Владислав Ховалыг сайыттың келгенин бодунуң блогунда дыңнаткан.

Чурттуң кол эмчизи бөгүн онкология диспансери, республиканың 1 дугаар эмнелгезиниң терапия корпузу база республиканың чаа консультативтиг-диагностика төвү эмнелге албан черлеринге чедер планныг.

Ооң мурнунда, 2021 чылда Михаил Мурашко Тывага кээп чораанын сагындыраал.