Тываның бюджединде социал чарыгдалдар үлүү планныг көргүзүгнү ашкан

Тывада 2023 чылда республика бюджединиң 9 айында күүселдезиниң түңнелдерин үндүрген. ТР-ниң Саң-хөө яамызының сан-чурагайы-биле алырга, январь – сентябрьда чарыгдалдарның түңү 42 млрд. 289,3 млн. рубль, а орулгалар – 39 млрд. 777,6 млн. рубль болган. А чедишпес түңү 2 млрд. 511 млн. рубль ажып, 2023 чылда бюджет дугайында хоойлуда бадылаттынган түңден ийи катап көвүдээн.

Регион үш кварталда үндүрүг болгаш үндүрүгге хамаарышпас орулгалардан 8 млрд. 740,3 млн. рубль акшаны чыгган. 2022 чылдың ол-ла үезинге деңнээрге, өзүлде 9,8 хуу, азы +776,8 млн. рубль. Күш-ажыл төлевириниң кудуку хемчээлин индексастаанындан, акцизтиг барааннар саарлыгазын көвүдеткенинден, биче болгаш ортумак бизнести идепкейжиткенинден бюджетче 751,6 млн. рубль немелде акша орулгазын киирген.

2022 чылдың январь-сентябрьге деңнээрге республиканың каттышкан бюджединиң чарыгдалдары 3,9 хуу кызырылган - 42 млрд. 289,3 млн. рубль чедир. Ооң 31,5 млрд. азы 75,4 хуузун социал адырже угландырган – 2023 чылда бюджет дугайында хоойлу-биле планнаандан 5 хире хуу хөй.

Эрткен чылдың январь-сентябрьга деңнээрге, республика бюджединиң бодунуң орулгалары 11 хууга көвүдээн. Бюджетче кирген ниити түң 632,1 млн. рубльга көвүдеп, 6 млрд. 441,8 млн. рубль болган. 2022 чылдың тос айынга деңнээрге, муниципалдыг бюджеттерниң орулгалары 145 млн рубльга көвүдеп, 2,3 млрд рубль болган.