Тыва школаларны бүрүнү-биле септеп чаартыр талазы-биле тергииннерниң санында

«Чаңгыс демниг Россияның» чиңгине чөвүлелиниң секретары Андрей Турчак школаларны бүрүн септеп чаартыр талазы-биле тергииннерниң санынче Тыва Республика база киргенин адаан. Партияның шөлчүгежинге, «Өөредилге» национал төлевилелдиң «Өөредилгени сайзырадыры» программаны күүсеткениниң түңнелдерин РФ-тиң Чырыдыышкын яамызы-биле кады үндүрген.

- Чырыдыышкын яамызынга, Тудуг яамызынга, губернаторларга база регионнарда ол программаны харыылап турар шупту коллегаларывыска четтиргенивисти илереттивис – деп, Андрей Турчак чугаалаан.

Эрткен чылын Тываның 13: Шагаан-Арыг хоорайның гимназиязы, Туран, Ак-Довурак хоорайларның база Чал-Кежиг, О-Шынаа, Бүрен-Аксы, Сесерлиг, Дөң-Терезин, Тоора-Хем, Сарыг-Сеп, Булуң-Терек база Сосновка суурларның школалары федералдыг программа ачызында долузу-биле чаартынган.

- Ийи чылда федералдыг программа ачызында Тывада шупту школаларның 23 хуузун үндезини-биле септеп чаарткан. Ол дээрге республикада 40 школаның оран-савазы-дыр – деп, республиканың баштыңы Владислав Ховалыг бодунуң блогунда дыңнаткан.

Школаларны үндезини-биле эде чаарткан тергииннерниң аразында Тывадан аңгыда, Вологда, Магадан, Мурманск, Саратов, Сахалин областар, Адыгея, Ингушетия, Марий Эл, Мордовия, Татарстан, Чечен республикалар, Санкт-Петербург хоорай барын Андрей Турчак чугаалаан.

«Өөредилгени сайзырадыры» күрүне программазы-биле өөредилге албан чериниң оран-савазын чаартырындан аңгыда, уругларга, оларның башкыларынга таарымчалыг байдалдарны тургускан иштики дериишкинин четчелээри хамааржыр деп ол демдеглээн.