Тываның волонтёрлары «Россияның суглары» акцияга киржилгези-биле он шылгараңгайлар санынче кирген

Эки турачы хүнүнүң бүдүүзүнде, Москвада «Россия» делегейниң делгелге-шуулганында, суг объектилерниң эриктерин боктан аштаар талазы-биле «Россияның суглары» бүгү-российжи волонтер акциязының юбилейлиг сезонунуң түңнелдерин үндүрген. Акцияда киржип турар регионнар рейтингизин чылдың-на түңнеп турар. Бо чылын Тыва Республиканың эковолонтерлары 2022 чылда турганындан 22 пунктуга көдүрлүп, 10-гу черже үнген.

Тываның Баштыңы Владислав Ховалыг республиканың экоактивчилерниң чедиишкинниг үре-түңнелдери дээш байырын чедирген.
- Чуртта улуг экологтуг эгелээшкин – «Россияның суглары» акцияның ТОП-10 тулган командалар санынче бистиң эковолонтерларывыстың киргени дээш, Эки турачылар хүнүнде байры чедирип, ону онзалап демдеглекседим. Тывага эрткен акцияга алды муң хире кижи киришкен. Активчилер Улуг-Хем, Хемчик, Нарын, Каа-Хем, Туран хемнерниң, Азас база Чагытай хөлдерниң эрик чоогунда 480 хире километр ниити черни аштап арыглаан. Эковолонтерлар беш чүс ажыг кубометр бокту чыып, чүдүрген – деп, республиканың удуртукчузу бойдус камгалакчыларынга байырын чедирип тура, бижээн.

Россияның Бойдус яамызының суг курлавырларының адырында күрүне политиказы база ону таарыштырар департамент директору Роман Минухин база Россияның Бойдус яамызының суг ажыл-агый комплекизин хөгжүдер төптүң директору Вячеслав Дунаев эрткен чылдарда акцияның ниити түңнелдерин таныштырып, чарлаан.

«Россияның сугларынга» бо чыл – юбилейлиг чыл дээрзин демдеглээн. Эки турачылар бүгү чуртта далайлар, хемнер база хөлдер эриктерин ам 10 дугаар чыл аштап арыглап турар.

Акцияның субботниктеринге 9,5 миллион волонтерлар киришкен. Суг объектилериниң эриктеринден 11 миллион шоодай бокту чыгган. Ол дээрге ортумак хемчээлдиг 91 муң «КамАЗ» чүък машиналары хире бок-тур.

2023 чылда акцияның хемчеглеринге 1 576 711 волонтерлар киржип, 28 000 хемчегни организастап, 38 459 км эрик чоогун аштап, 1 847 737 шоодай азы 146 645 кубометр бокту чыып, чүдүрген.