Тывада 130 хире аныяк өг-бүлелер чурттаар байдалын экижиткен

Чурттуң президентизиниң мурнунда боттандырар сорулгаларының бирээзинге хамаатыларның чуртталга байдалы экижидери хамааржырын Тываның Баштыңы Владислав Ховалыг бодунуң блогунда демдеглээн. Президентиниң салган сорулгазының боттандырыышкынынче Тыва бо чылын федералдыг деткимчени ап, 2 хуу ставкалыг регионалдыг ипотека программазының программазын эгелээн. Республика оон аңгыда “Аныяк өг-бүлелерни чурттаар оран-сава-биле хандырары” дээн ышкаш күрүне программаларында киржип турар.

Республика Баштыңы Владислав Ховалыгтың чугаазы-биле алырга, республика ол угланыышкынга 178 млн ажыг рубльди тускайлап, 137 аныяк өг-бүлеге чуртталга байдалын экижидер арганы берген. Социал төлевир акша-хөреңгизин чурттаар оран-сава садып азы тудуп алыр дээн чарыгдалче киириштирип болурун ол демдеглээн.

Владислав Ховалыг республиканың Тудуг яамызы биле муниципалитеттер киржикчилеринге программа боттандырылгазының ажык-чарлыын хандырып, а кордакчыларга субсидия алыр оочурда ооң ээлчээн база алыр үезин чогуур үе шаанда дыңнадыр ужурлуг деп демдеглээн. Тус чер эрге-чагыргалары бодунуң ээлчээнде, төлевилел боттандырылгазының дугайында үргүлчү дыңнадып, чаңгыс чер чурттугларының ол темага айтырыгларынга үе шаанда дүрген харыыларны бээр ужурлуг.

“Программа келир чылын база ажылдаар. Ам-даа 100 ажыг киржикчиге сертификаттарны бериптер боор бис. 13 чыл иштинде Тывада 2154 өг-бүле бажың садып алырынга социал төлевирлерни алган” – деп, Владислав Ховалыг дыңнаткан.