Республиканың чамдык хоорай, суурларында коронавирус аарыы көвүдеп турар

Росхереглелхайгааралының Тыва Республикада эргелели эрткен неделя дургузунда, ноябрьның 27-ден декабрь 3-ке чедир, чаа коронавирус халдавырындан аараан 79 таварылга бүрүткеттингенин дыңнаткан. Кызыл, Ак-Довурак хоорайларның, Улуг-Хем, Барыын-Хемчик, Кызыл, Тожу, Каа-Хем, Тес-Хем база Бии-Хем кожууннарның чурттакчылары ук аарыгдан аарып турары демдеглеттинген.

COVID-19-дан аарааннарның 49-зу улуг кижилер, а 30-и - 17 харга чедир бичии уруглар. Халдавырдыг аарыглар эмнелгезинде 30 аарыг кижи чыдар, 28 кижиниң байдалы ортумак, 2 кижиниң – аар, 1 кижи - ИВЛ аппаратта коштунган. 49 кижи - амбулаторлуг эмнээшкинде.

Хостуг оруннар саны четчир, ындыг болзажок эпидемиолог эмчилер санитарлыг камгалал хемчеглерин күштелдирерин сагындырган. Бирги ээлчегде коронавируска удур тарылганы салдырар, арыг-силиг алдынар, хөй улус чыылган черлер барбас, социал ырак хемчээлди сагыыр, амыдыралдың кадык овур-хевирин эдерер.