Декабрьның 14-те Владимир Путин-биле «дорт шугум» болуп эртер

Президентиниң парлалга-секретары Дмитрий Песков ооң дугайында дыңнаткан. Бо удаада күрүне баштыңы «дөрт шугум» биле түңнел парлалга-конференциязын каттыштырып, “Владимир Путин-биле чылды түңнеп” деп чаа хевирге ужуражылганы эрттирер.

Бөгүнден, декабрьның 1-ден эгелеп, айтырыглар чыылдазы эгелээн. moskva-putinu.ru сайт, «ВКонтакте», «Одноклассники» социал четкилер база мобильдиг капсырылгалар дамчыштыр 0-40-40 дугаарже халас СМС-ке база 8-800-200-40-40 дугаарже халас долгааш, айтырыгларын салып болур.

Президентиниң чылды түңнээн кол хемчээнче российжи регионалдыг болгаш федералдыг журналистерни, даштыкы МИЧ-тиң аккредитациялыг ажылдакчыларын чалаар.

“Программа ооң мурнунда ышкаш телеканалдарга үнер. Президент хамаатыларның айтырыгларынга харыылаар болганда, дорт дамчыдылга болгаш түңнел конференция хевирлиг болуп эртер. Москвага аккредитация эрткен регионалдыг, федералдыг, даштыкы массалыг информация чепсектериниң журналистери студияга турар” – деп, РФ-тиң президентизиниң парлалга-секретары чугаалаан.
Чурт баштыңы-биле болур ужуражылга каш шак иштинде үргүлчүлээрин амдыызында ылавылаваан, ындыг болзажок ол элээн шак болу бээрин чугаалаан.
Владимир Путинниң дорт шугуму база парлалга-конференциязы 2001 чылдан бээр эртип турарын сагындыраал. Эрткен чылын чурт баштыңчызы улуг парлалга-конференциязын эрттирбээн-даа болза, журналистерниң эң чидиг айтырыгларынга харыылаан.