Тываның Баштыңы школалар тудуглары кайы хире чоруп турарын хынаан

Владислав Ховалыг Кызыл хоорайда Бай-Хаакскаяда база Вавилин ээтпээнде, Сукпак база Балгазын суурларда школалар тудуу кайы хире чоруп турарын хынаан. «Өөредилге» национал төлевилелдиң федералдыг деткимчези-биле республикада тудуп турар 11 школаның дөртүн бо чылын дужаар ужурлуг. Регион чаа өөредилге албан черлерин ажыдып, чеди муң ажыг өөренир олуттарны ажыглалче киирер.

Республиканың удуртукчузу объектилерниң кайы хире келгенин хынааш, ооң түңнелдерин бодунуң блогунда үлешкен. Кызылда Бай-Хаакская кудумчузунда база Кызыл кожууннуң Сукпакта – бо ийи школада ажылдар дооступ турарын ол дыңнаткан. Объектилерниң иштики ажылдары доозулган, даштында ажылдар адакталган, чогуур өөредилге дериг-херекселдерин садып белеткээн. Ажылчыннар класстарже мебельдерни киирип, школа столоваязында дериг-херекселдерни эптеп доозуп турар.

Кончуг дүрген туттунуп турар «Иркутский» микрорайонунуң Бай-Хаакская кудумчузунда школа тудуу доостур чоокшулаан. Чаа школа ажыглалче кирерге, Кызылдың 5 биле 9 дугаар гимназияларында ол микрорайондан өөренип турар школачылар ынаар шилчип, “чүъктү” эвээжедир. Микрорайоннуң чаа школазы чурттакчыларга эптиг байдалды тургузар.

Кызылдың Вавилин ээтпээнде база Балгазын суурда школаларның дериг-херекселдери база эт-севи декабрьда кээр. Тудугжулар объектиде ажылдарны дүрген доозар дээш шалыпкын ажылдап турар.

Вавилин ээтпээниң чуртакчылары школа тудуун шагда-ла манаан. Кызылдың ук микрорайонунуң социал инфраструктура хөгжүлдезиниң айтырыы – хоорай чагыргазынга хамаатылардан киирип турар айтырыгларның эң колу. Амгы үеде ол черниң школачылары өөренир дээш каш-каш километрни эртип чоруп турар.

Аварийлиг деп санаан эрги школаның аңгы оран-саваларынга өөренип турган Балгазын суурнуң өөреникчилери чаа школазын четтикпейн манап турарлар. Төлевилел езугаар ол школага 616 өөреникчи өөренир.

- Шупту дөрт объектиже чылыгны база чырыкты кошкан, оларны ажыглалче кииреринге белеткел чоруп турар. Федералдыг деткимче дузазы-биле социал инфраструктураны чаартып, ам-даа улгаттырар бис – деп, Владислав Ховалыг чугаалаан.