Тываның болгаш Камгалал яамызының чогаадыкчы коллективтери чаңгыс сценага оюн-көргүзүүн бараалгаткан

Дүүн, Москва хоорайда Российжи Армияның Төп академиктиг театрының төөгүлүг сценазынга, Тыва Республиканың культура болгаш уран чүүлүнүң мастерлери база Россияның Камгалал яамызының чогаадыкчы коллективтери каттышкан оюн көргүзүү-биле көрүкчүлерни өөртүп, магадынчыг кежээни хайырлаан. Россияның Улустуң артизи, Тываның улуг өңнүү Игорь Бутман тускай аалчы кылдыр чалаттырган.

Тываның Баштыңы Владислав Ховалыг Тыва Республика биле Россияның Камгалал яамызының культурлуг кады ажылдажылгазы онзагай төөгүлүг дээрзин демдеглээн.

«Чурттуң төвү Москва хоорайда делегей чергелиг “Россия” делгелге шуулганның ажылында Тыва Республика хүннерин эрттиреринге улуг дузаны көргүзүп, бистиң бүгү-ле эгелээшкиннеривиске бүгү талалыг деткимчени көргүзүп чорууру дээш, хүндүткелдиг чаңгыс чер чурттуувус, камгалал сайыды, Россияның Маадыры Сергей Кужугетович Шойгуга, яамының ажылдакчыларынга канчаар-даа аажок улуг өөрүп четтиргенивисти илередип тур бис» – деп, Владислав Ховалыг демдеглээн.

Кежээни Тываның национал хөгжүм оркестри, "Алаш" бөлүү, «Саяннар» национал хөгжүм болгаш танцы театры, Т.Д. Дулуш аттыг Үрер хөгжүм оркестри, Россияның улустуң артизи Игорь Бутман база "Тува Джаз Бэнд", Тываның улустуң артизи София Кара-оол, Россияның болгаш Тываның алдарлыг артизи, полковник Сергей Дурыгинниң удуртканы Россияның Камгалал яамызының Төп шериг оркестри, «Красная Звезда» ыры болгаш пляска ансамбли, Станиславский база Немирович-Данченко аттыг Москваның академиктиг хөгжүм театрының солистери Субедей Дангыт биле Камилла Исмагилова, Улуг театрның Аныяктарның опера программазының солизи Карина Ховалыг, Тываның күрүне филармониязының солизи Дамырак Монгуш, аныяк сылдыстар Денберел Ооржак, Сайын-белек Доржу дээш өске-даа артистер кежээни каастап, москвачыларга болгаш аалчыларга уттундурбас номерлерни көргүскен.