Тывадан аныяктар «Россия» делгелгениң шөлүнге кудазын ойнаан

Ноябрьның 21-де, Москвада на ВДНХ-да эртип турар «Россия» делгелге үезинде Тыва Республиканың Хүнүнге тураскааткан байырлыг хемчегде, Начын Кунзен-оол биле Белекмаа Ондар тыва езу-чаңчылдарны сагып, өг-бүле тудар куда доюн дүжүргеннер. Байырлыг езулал «Россия» делгелгениң 75-ки павильонунга Тыва Республиканың хүнүнде болуп эрткен. Аныяктарның ада-иелери база хөй санныг көрүкчүлер езулалдың херечилери болганнар.

Тываның Баштыңы Владислав Ховалыг өг-бүле туткан аныяктарга байыр чедирип, бот-боттарын хүндүледип, ынакшылын камнап чурттаарын чагып, чурттуң улуг болуушкуну болуп турар үеде куда дойну эрттирери улуг харыысалга-дыр деп демдеглээн. Тываның Баштыңы аныяк өг-бүлени деткип, Россияның кайы-даа регионунга куда аян-чоруун кылып, дыштаныр кылдыр 300 муң рубльдиң сертификадын белекке берген.

Тываның Национал театрының артистери куда езулалын деткип эрттиришкен. Тыва куданың езулалдары канчаар эрттерин көрүкчүлрге сонуургаткан. Бир дугаарда аныяктарның салым-чолу тутчуп, ийи төрел аймак каттышканын көргүскен дүгдээшкин езулалын кылып, кыстың чажын ийи чара өрүп, чавазын баглаан.

Куда эгелээр мурнуу чарыында кудаларны уткуур "эзеңги дээжизи" деп оюн-көргүзүгнү көргүзүп, ийи тала кожаңнарны, тыва оюннарны ойнаан.

Москвачыларны "Думаалайын ажыдары” деп езулал сонуургалды болдурган. Күдээ оол өгге кээп, кыстың өнчүзүн чыып алган соонда, думаалайын ажыдар. Кыстың шывыы иезинден дамчып келген, улуг ужур-утка сиңген аймактың эдилели болур. Душтук кыс биле оолдуң чоокшулажырын көргүскен "чырыктажыыр" езулалды база көргүскеннер. Кыс бичии эътти ызырып алырга, ону аныяк оол үзе ызырып алыр. Ол келин кыстың ашааның аймаанче шилчээниниң демдээ. Куданың бир чараш кезээ – кудаларга хүндүткелдиң кол чеми ужаны сунуп, оюн-тоглааны уламчылаан.

Тыва аныяктарның эрттирген кудазы «Россия» делгелгеде регионнар хүнүнүң үезинде ойнаан он дугаар шайлалга болган. Бурят Республикадан, Ямал-Ненец база Ханты-Мансийск автономнуг округтардан база эвенк, долган, марий, тюкалин аныяктар кудазын ойнаан, ол ышкаш Кузбасстың, Нижегородскының база семейск-гуран езу-чаңчылдарны сагаан бадылажылга езулалдары болуп эрткен.