Улуг назылыг кижилерни хаара тырттар төптер

Идепкейжи узун назын байдалдарын тургузары – Социал фондунуң мурнады боттандырар ажылы. Харылзаа төптерин ажыдар төлевилелдиң социал миссиязы ол. Ынчангаш бүгү чуртта Социал фондунуң клиент албанының баазазында улуг назылыг кижилерге төптерни ажыдып турар. 80 регионда 200 ажыг төптер ажылдап турар, 2023 чылда Тывада сес, ооң санында үш төптү ноябрьда ажыткан. РСФ салбырының клиент албаннарында улуг назылыг келгеш, пенгсия болгаш социал хандырылга айтырыгларын салып, дыштанып олурарынга таарымчалыг булуңнарда төптерни ажылдаткан.

– Улуг назылыг кижилерниң харылзажырынга төптерни ажытканы ооң адындан-на билдингир. Хүндүлүг дыштанылгаже үнген кижи бот-сайгарлырынга, идепкейжи болур аргалар барын билир чугула. Шенелде төлевилелдиң мурнунда ындыг даалгалар бар. Төптер улуг назылыг кижилерниң амыдыралын элээн чымыштыг болгаш солун болдурар ужурлуг – деп, Соцфондунуң регионалдыг салбырының эргелекчизи Светлана Кенден төптерниң ажылының дугайында чугаалаан.

Төптерниң ажыдыышкыны – кожууннарда ол улуг болуушкун болур болгаш, чагырга черлери, төлээлекчилер хуралдары болгаш сумулар, шупту албан черлери, бизнес төлээлери база хөй-ниити организациялары оларны деткип турар. Төлевилелдиң ужур-дузазын билип, кожуун чагыргалары экскурсиялаар автотранпортту берип, бүгү талалыг деткимчени көргүзүп турар.

Кижилер үезин чөптүг эрттиреринге таарымчалыг байдалдарны тургускан, төптерде мини-библиотекаларны, интернеттээр компьютер зоназын, шахматтаар черлерни, спортчу булуңнарны аңгылаан, шайлаар, мастер-класстар база ужуражылгалар эрттирер шөлдерни организастаан.

Төптер культура болгаш спорт албан черлери, соцкамгалал эргелелдери, хөй-ниити каттыжыышкыннары, эмнелге организациялары, чээли албан черлери-биле кады ажылдап турар. Айытынган албан черлери пенсионерлерге лекцияларны, тренингилерни, эмчи шинчилелдерин, саң-хөө билиинге кичээлдерни болгаш өске-даа хемчеглерни график езугаар эрттирип турар.

2023 чылдың январьдан Тываның төптеринге болгулаан 400 ажыг хемчеглерге улуг назылыг 3700 ажыг кижи киришкен. Пенсионерлер ортузунда хол-биле кылыглар база чем кылыр, фитнес болгаш йога кичээлдери эң нептереңгей, төптүң баазазында чогаадыкчы коллективтер репетициялап турар. Республиканың Шагаа, Март 8, Тиилелге хүнү, Кылаштаарынга бүгү-делегей хүнү, пенсионерлер спартакиадазынга киржилге - хемчеглерниң чүгле эвээш кезии.

Ак-Довуракта төп октябрьда ажыттынган, а ооң активчилери тыва тон даараар мастер-класска киришкеш, ам боттарының даарап алганы тоннарын кедип турар. Хоочуннар ТШО киржикчилеринге чаштыныр четкилерни өрүп, чуң уктарны аргып, таалыңнарны даарап, дузазын көргүзүп турарлар.

Төптүң активчилери арга-дуржулгазын солчур дээш бот-боттарынче аалдажыр чаңчылдыг. Майда Кызылдың хоочуннары Туран хоорайда төпке чедип, экскурсиялаан. Туран хоорайның баазазын сонуургап, хемчеглер эрттиреринге арга-сүмезин солушкан. Баштайгы ийи - Кызыл биле Туранның төлээлери барыын кожууннарда ажыттынар төптерге хүндүлүг аалчылар болуп чедип, чогаадыкчы оюннарын бараалгадып, оларның амыдыралынга чаа төптер кандыг эки салдарны чедиргенин сонуургаткан.

Россияның Социал фонд салбырының клиент албаннарында төптерже 50 хардан өрү назылыг хоочуннар кээп турар. Активчилер аразында шагда-ла хүндүлүг дыштанылгада-даа, ажылдап-даа турар пенсионерлер бар.

Тывада ажыттынган сес төп клиент албанының графиги езугаар, понедельниктен пятницага чедир 09.00 - 18.00 шактарда ажылдап турар:

• Туран хоорай – Кызыл партизаннар кудумчузу, б. 21;

• Кызыл хоорай – Красноармейская кудумчузу, б. 146;

• Кызыл-Мажалык суур – Буян-Бадыргы ноян кудумчузу, б.61;

• Ак-Довурак хоорай – Данзырык Калдар-оол кудумчузу, б.23;

• Тээли суур – Степная кудумчузу, б.19;

• Хову-Аксы суур – Мир кудумчузу, б.11;

• Шагаан-Арыг хоорай – Советтиг Тываның 30 чылы кудумчузу, б. 40;

• Чадаана хоорай – Сергей Шойгу кудумчузу, б.41.

Олар шупту хостуг үезин солун болгаш ажыктыг кылдыр эрттириксээн үе- чергежилерин манап турар.