Тыва Республиканың Баштыңының Кубогу дээш мини-футболга 10 команда кордап киржир

Ноябрьның 22-25 хүннеринде «Субедей» спорт комплекизинге, Тываның Баштыңы Владислав Ховалыгның Кубогу дээш мини-футболга регионнар аразында ийиги турнир болуп эртер.

Киржикчи командалар Кызылче кээп эгелээн. Чеди оюннуң бирги маргылдаазы бөгүн 12 шакта эгелээр.

За Сибирь регионнарының Иркутск облазындан «ИрАэро» база «Байкал 97», Хакасиядан «LiGaPro» командалар-биле кады шупту 10 команда кол шаңнал дээш мөөрейлежир.

Тываны «Субедей», «Эне-Сай», «Центр Азии» «Мажалык ОПТИ», «Сбер», «Барум», ТР-де ОБЯ кол эргелелиниң командалары төлээлээр. Олар шупту сентябрьда шилилде оюннарны эрткен.

Маргылдааның кол шииткекчизи - Мижит-Доржу Ужар-оол, кол секретары - Борис Кульбистеев.

Тиилекчи командаларга 500000 рубль түңнүг шаңнал фондузундан акшаларны тыпсыр. «Тулган вратарь», «Тулган халдакчы», «Тулган ойнакчы» тускай шаңналдарны шылгарааннар алыр.

Регионнар аразының бо маргылдаазы ийи дугаар эртери бо, эрткен чылың сентябрьда бирги оюннар болганын сагындыраал. Маргылдааны ТР-ниң Спорт яамызындан аңгыда, Тыва Республиканың Мини-футбол лигазы организастап эрттиржип турар. 

Маргылдааның түңнел оюннары ноябрь 25-те 15 шакта эгелээр, кирери хостуг.