Бөгүн "Россия" бүгү-делегей делгелге-шуулганынга Тыва Республиканың хүнү болуп эртер

Бөгүн, ноябрьның 21-де ВДНХ-да, "Россия" бүгү-делегей делгелге-шуулганынга Тыва Республиканың хүнү болуп эртер. Тываның хүнүнге тураскаткан хемчеглер делгелгениң элээн каш шөлдеринге – бистиң республиканың экспозициязында, культура төлевилелдериниң зоназында база «Улуг-Хемниң төрүттүнген черинде» деп концертти көргүзер кол кудумчу сценазында болуп турар.

Тываның Баштыңы Владислав Ховалыг сөөлгү алды чылда регионнуң чедиишкиннерин болгаш сайзыралын таныштырган стендини аалчыларга болгаш көрүкчүлерге көргүзер.

Ажыл-агый зоназында, «Келир үеже инвестициялар. Тываны хөгжүдериниң перспективтиг угланыышкыннары» стратегтиг сессияда бистиң республиканың мурнунда калбак, экономиктиг база социал шинчилиг территориалдыг хөгжүлдени углап-башкарар стратегтиг сорулгаларны көргүскен. Стратегтиг сессияга РФ-тиң Үлетпүр-садыг яамызының металлургия база материалдар департаментизиниң директорунуң оралакчызы Владислав Демидов, РФ-тиң транспорт сайыдының оралакчызы Валентин Иванов, РФ-тиң Экономиктиг сайзырал яамызының регионалдыг политика департаментизиниң директору Дмитрий Косткин, Россия регионнарының стратегтиг планнаашкын, инвестициялыг болгаш инновациялыг хөгжүлде адырында төлевилелдер боттаныышкынында Стратегтиг ажылдар төвүнүң регионнар экономиказының төвүнүң удуртукчузу Марат Фаттахов, «Енисей Сибирин хөгжүдер корпорация» АКН-ниң чиңгине директору Сергей Ладыженко олар киржир.

Бөгүн "Аян-чорукту эскерип киржиилиңер" шөлге Тываның турисчи шыдалының дугайында "Тыва инкогнито" турисчи брендилиг чаа маршрутту таныштырар. Кызылда база Тываның аңгы-аңгы булуңнарында 24 черлерин таварар бо маршруттуң путевкаларын делгелгени көрүп келгеннерге ойнадыр. Бистиң регионнуң эң билдингир турисчи черлери маршрутта кирген – Тываның эң онзагай хөлдери база даглары, шажынчы черлер, сыын ажыл-агыйы, хамнарга база орус чүдүлгелиглерге чедери дээш, оон-даа өске.

Тываның хүнүнүң көрүкчүлери Тыва Республиканың аас чогаал ансамбльдарының «Көшкүн чоннуң делегейи» чыынды программа база тыва улусчу чаңчылдарны сагып эртер куда байырлалын Культурлуг төлевилелдер зоназынга сонуургап көөр. "Алаш" бөлүүнүң хөөмейге мастер-класстыг «Тыва хөөмей. Тыва чоннуң ховар эртинези» интерактивтиг лекциязындан тываларның культуразын чоок билип ап болур. Ол ышкаш «Скиф өнчүзү: Тываның Хааннар шынаазының алдыны» лекцияга киржип болур. Тываның хүнү кол кудумчу сценазынга «Улуг-Хемниң төрүттүнген черинде» деп республиканың башкарыкчы артистериниң база чогаадыкчы коллективтериниң концерти-биле доостур.

Регион хүнүнүң программазы:

75 дугаар павильон:

11:00-11:30 — культурлуг төлевилелдер зоназы — Тыва Республиканың Баштыңының регионну таныштырары;
13:00-14:00 — 2-ги биче зал (солагай талазында) — «Келир үеже инвестициялар. Тываны хөгжүдериниң перспективтиг угланыышкыннары» стратегтиг сессия;
14:00-15:00 — культурлуг төлевилелдер зоназы — ТР-ниң аас чогаал бөлүктериниң «Көшкүн чоннуң делегейи» чыынды программазы;
15:30-16:00 — культурлуг төлевилелдер зоназы — «Тыва национал шайлалга» куда байырлал езулалы;
17:00-18:00 — 2-ги биче зал (солагай талазында) — «Тыва хөөмей. Тыва чоннуң ховар эртинези» интерактивтиг лекция;
18:00-19:00 — 2-ги биче зал (солагай талазында) — «Скиф өнчүзү: Тываның Хааннар шынаазының алдыны» лекция.
Кол кудумчу сценазы:
20:00-21:00 — «Улуг-Хемниң төрүттүнген черинде» концерт.