ТШО-да Тываның шериг албанныгларынга техниктиг дериг-херекселдерни ам база чедирген

Тываның Баштыңының ТШО айтырыгларының талазы-биле тускай төлээзи Тимур Куулар дайынчыларның чагыын чедирери-биле, бистиң республикадан албан эрттирип турар оолдарның РФ-тиң чаа регионнарында шериг кезектеринде ноябрь эгезинде четкеш келген.

Тускай төлээ 55-ки, 74-кү база 38-ки мотоадыгжы бригадаларның база 127-ги мотоадыгжы дивизиязының быжыглаттынган черлеринге чедип, шериг кезектериниң командылалы-биле ужуражып, амгы үениң байдалын база дайынчыларның эң чугула айтырыгларын сайгарып чугаалашкан. Чаңгыс чер чурттуг дайынчыларга дузалажыр күзелдиг сайгарлыкчыларның, организацияларның болгаш кижилерниң “Деткимче” фондузунче шилчиткен акша-хөреңгизинге саткан тускай техниктиг дериг-херекселдер комплектилерин шериг кезектеринге хүлээткен.

Тускай төлээ хууда состав-биле ужурашкаш, шериглерниң дилеглерин чыггаш, ону сайгарып көргеш, күүседир кылдыр регионалдыг ведомстволарже дамчыткан.

Тимур Куулар Тываның Баштыңы Владислав Ховалыгның Төп Шериг округунуң командылакчызы, генерал-полковник Андрей Мордвичев-биле ужуражылгазынга база киришкен. Ужуражылга үезинде республика чурттакчыларының албан эрттирип турары кезектеринде гуманитарлыг болгаш техниктиг хандырылга айтырыгларын, региондан четкен дузаны таптыг хуваар болгаш ажыглаар айтырыгларны чугаалашкан.

Тускай төлээ сургакчылаашкындан келгеш, бистиң дайынчыларывыс хүлээлгелерин төлептиг күүседип, командылалга мактадып турарын чугаалаан. Дайынчы хей-аъдын чылыг сөстери база ажыктыг херектери-биле кезээде көдүрүп чоруу дээш, бистиң оолдар чаңгыс чер чурттугларынга четтиргениниң сөстерин дамчыткан.

Тускай төлээ бо чылдың төнчүзүнде ТШО зоназында Тывадан шериг оолдарга база катап ужуражып чедер.