Тывада республиканың уруглар эмнелгезинде 300 уруг Соок-Ирейже чагааларын чоруткан

Тывада Чаа чылга белеткел ажылдары, ооң иштинде байырлал бүдүүзүнүң хемчеглери эгелээн. Республиканың уруглар эмнелгезинде чыдар уруглар “Мен – эр-хей мен!” деп акцияга киришкен. 300 хире уруг акцияга киржип, Соок-Ирейге чагааны бижэнин, Тываның Кадык камгалал яамызы дыңнаткан. Эртип турар 2023 чылда эң-не кол чедиишкиннерин тоолчургу илбичиже чагаазында бижээннер. Соок-Ирейге чагаа дамчыдар почтачының ролюн ВТБ банк бодунга алган. Чээли албан чери Чаа чыл бүдүүзүнде белектерни чедирер.

Банкының «Мир без слёз» ачы-буян программалыг акциязы-биле Тываның эмнелгелери сурдологтуг база офтальмологуг шинчилге чорудар бөлүк дерик-херекселдерни алган. Ам уруглар база элээдилер соңгаар чоруп турбайн, маңаа чаа аппаратурага кулак болгаш карак аарыгларын шинчидип база эмнедип алыр аргалыг апарган. Дериг-херекселдерни эмнээшкин практиказында ажыглап эгелээн болгаш, ай санында 400 хире шинчилгени кылып турар.

ВТБ-ниң Красноярск крайда, Хакас база Тыва республикаларда башкарыкчызы Наталья Табаринцеваның чугаазы-биле алырга, амгы үениң дериг-херекселдери эмчилерниң ажылын күштелдирип, уругларның кадыкшылын экижидер арганы бээр. Эмнээшкин соонда уругларның өөрүшкүзүн көөрү – база чугула болуушкун. «Мен – эр-хей мен» акция-биле уруглар эрткен чылда чедиишкиннерин сактып, Соок-Ирейге ооң дугайында бижип, ол чагаазын тускай хааржакче сугар арганы берген» – деп, Табаринцева чугаалаан.

Акция Ангарск, Астраханьда, Белгород облазының Валуйки, Курск облазының Курчатов, Кызыл, Моздок, Москва, Омск, Санкт-Петербург, Севастополь база Пермьде партнеру эмнелгелерде эртип турар. Акцияның киржикчилери Чаа чылда сонуургалының аайы-биле белектерни алыр. Уруглар Айтиша робот-биле ойнавышаан, саң-хөө билиглерниң эге өөредиин эртер. Чагааның авторларын бодунуң ажыл-ижинде билдингир профессионалдар баштаан чаңгыс үзел бодалдыгларның онлайн-ниитилежилгезинче чалаар. Ол дээрге спортчу, хөгжүмчү, продюсер база блогерлер бооп болур. Ниитилежилгениң лидерлери боттарның чажыттарын үлешкен онлайн-мастер-класстарны уругларга эрттирер.

Байырлалды манап, хуулгаазын чүүлге бүзүрээри – уругларның дүрген сегий бээринге дузалыг деп, республиканың уруглар эмнелгезиниң кол эмчизи Максим Ооржак санап турар. «Республиканың бичии уруглары каң кадык өссүн дээш, боттарывыстың талавыстан болдунар-ла аргаларны ажыглаар бис» – деп, доктор чугаалаан.