Тываның кожуунарынче 10 чаа дүрген дуза машиналарын хувааган

Бөгүн, ноябрь 3-те, Тываның Чазак бажыңының чанынга чаа дүрген дуза автомашиналарының дүлгүүрлерин байырлыг байдалда ээлеринге дамчыткан. Республиканың сес кожуунунуң эмнелге албан черлери 10 автомобильдерни бо хүн алган.

Тываның Баштыңы Владислав Ховалыг чаа автотехникалыг болганы-биле эмчилерге байырын чедирип, аарыг кижилерге эмчи дузазының шынары экижииринге идегелин илереткен.

«Бо чылын ийи дугаар дүрген дуза машиналарын тыпсып турарывыс бо. «Кадык камгалалы» национал төлевилел деткимчези-биле “дүрген дуза” автопарыгының 90 хуузу чаартынган. Бөгүнде бистиң республикада 10 чылдан хөй үеде ажыглаан дүрген дуза автомобильдери чок. Бо немей келген автомашиналар дүрген ачы-дуза чедирилгезиниң шынарын оон-даа экижидер боор» - деп, ол чугаалаан.

Чаа автомобильдер аарыг кижилерни сөөртүрүнге чугула дериг-херекселдер-биле четчелеттинген. В класстың автомашиналары Таңды, Мөңгүн-Тайга, Тере-Хөл, Тожу, Өвүр, Чөөн-Хемчик, Чаа-Хөл база Сүт-Хөл кожууннарның төп эмнелгелеринче аъттаныптар. Ийи машинаны республиканың дүрген эмчи дузаның база айыыл-халаптар медициназының төвүнче дамчыткан.

Мөңгүн-Тайга кожууннуң төп кожуун эмнелгезиниң автопарыгы дөрт дугаар автомобильди алган. Мөңгүн-Тайганың берге оруктарынга техника дыка дүрген сандан үне бээрин кол эмчи Дугар-оол Хертек чугаалаан. Чаа автомобиль бо барган дораан ажылче үнүптер.

«Кадык камгалалы» национал төлевилел боттанылгазы-биле Тываның чазаа регионнуң эмнелге албан черлерин четчелеп дериир ажылды чорудуп турарын демдеглеп каалыңар. Санитарлыг авиацияны хевирлеп, хөгжүдери, поликлиникалар, ФАП-тар тудуу, регионалдыг хан-дамыр төптерин, бирги хан-дамыр салбырын чепсеглээри, хөй угланыышкынныг эмнелгелерге база улуг поликлиникаларга амбулаторлуг онкология дузазының төптерин ажыдары көрдүнүп турар.