Тываның Баштыңы Орус географтыг ниитилелдиң регионалдыг салбырының хайгаарал чөвүлелиниң составын бадылаан

Тывада «Орус географтыг ниитилел» бүгү-российжи хөй-ниити организациязының регионалдыг салбырының хайгаарал чөвүлелиниң кижи санын болгаш составын тодараткан. Бо неделяда республика Баштыңының чогуур айтыышкыны үнген.

Чөвүлел 18 кежигүннүг. Орус географтыг ниитилел активчилериниң саналы-биле, чөвүлел дугайында дүрүм езугаар ооң персоналдыг составының даргазы албан-дужаалда Тываның Баштыңы Владислав Ховалыг соңгуткан. Оон аңгыда ТР-ниң Чазааның даргазының бирги оралакчызы Владимир Донских, ТР-ниң Баштыңының администрация база чазак аппарадының удуртукчузу Юрий Ананьин, «Орус географтыг ниитилел» бүгү-российжи хөй-ниити организациязының Тыва салбырының даргазы Кара-Кыс Аракчаа, Федерация Чөвүлелиниң кежигүнү Дина Оюн, чамдык яамылар, муниципалитеттер болгаш улуг бүдүрүлгелер төлээлери чөвүлелче кирген.

Хайгараал чөвүлелиниң дугайында дүрүмнү айтыышкында бадылаан. Ында бодунуң төлевилелинче бюджеттен дашкаар акша-хөреңгини хаара тударынга ОГН регионалдыг салбырга дузаны көргүзери кол сорулга деп айыткан. «Орус географтыг ниитилелде янзы-бүрү адырларда кайгамчык билиглерлиг активчилерниң ажыл-чорудулгазы-биле чазак командазының ажылын дүүштүрер херек. Оларның эксперт бодалынга даянып, өөредилге болгаш кижизидилге адырында, бойдус камгалал, туризм хөгжүлдезинде оларның хөделииишкиннерин эде тургузуп болур бис» - деп, Владислав Ховалыг санаан.

Орус географтыг ниитилелдиң Тываның республика салбыры 1974 чылдан бээр ажылдап турарын сагындыраал. 90 чылдарда организацияның ажыл-чорудулгазын соксаткан турган болза, 2001 чылда катап тургустунган. Тывада ОГН-ниң эң улуг төлевилелдериниң бирээзинге – 2011 чылдан бээр чай санында эртип турар "Кызыл – Курагино" делегейниң архелогтуг-географтыг экспедиция хамааржыр. Кызыл – Курагино демир-орук шугумун тудар зонада культура болгаш төөгү өнчү-салгалының объектилерин камгалап арттырары – ооң сорулгазы.