Тываның Баштыңы Начын Монгушка делегейниң хостуг хүрешке U-23 маргылдаазынга тиилээни дээш байырын чедирген

Октябрьның 23-тен 29 хүннеринде Тиранага (Албания) 23 харга чедир мөгелер ортузунга спортчу хүрешке делегей чемпионады болуп эрткен. Россияның хостуг хүреш мөгелери беш алдын медальды чаалап алган. 

Тываның Баштыңы Владислав Ховалыг чайынналчак тиилелгези дээш Начын Монгушка байырын чедиргеш, ол Тываның болгаш бүгү Россияның чоргааралы деп айыткан.
- Бүгү республика-биле кады аарып олурдувус. Хүреш ханывыста деп чүүлдү тыва спортчувус ам база бадыткады. Улуг тиилелгези дээш Начынга байыр чедирип тур мен! Ам-даа улуг чедиишкиннерни, сорулгаларын тура дүшпейн чедип алырын күзедим» — деп, Тываның Баштыңы бодунуң блогунга бижээн.

Россияның эң шыырак мөгелериниң аразындан 57 кил деңзиге Начын Монгуш хүрешкен. Чартык түңнел салыгда Кыргызстандан мөге Уулу Бекзат Алмазты 6:6 сан-биле ойнааш, төнчү хүрешче кирген. Эң сөөлгү салыгда Начын Армениядан эң шыырак мөге Манвел Хндзрцянны 11:0 сан-биле тиилеп, делегей чемпиону атты чаалап алган.

Россияның хостуг хүреш мөгелери Тиранага AIN аббревиатура-биле хүрешкеш, беш алдын, бир мөңгүн, ийи хүлер – сес медальды чаалап алган. Начын Монгуш (57 кг), Башир Магомедов (61 кг), Ибрагим Ибрагимов (65 кг), Иналбек Шериев (70 кг), Магомед Магомаев (79 кг) алдын медальдарны чаалап ап, делегей чемпионнары болганнар.