Тывада он школа бүрүнү-биле септеттинип, чаартынар

Федералдыг Чырыдыышын яамызының деткимчези-биле камгалап алганы чартык миллиард ажыг рубль ашкага бо чоокку ийи чылда школаларга капитал септелгелерни кылырын, Тываның Баштыңы Владислав Ховалыг бодунуң социал четкилеринде дыңнаткан. Республиканың удуртукчузу регионда өөредилге инфраструктуразын хөгжүдеринге демниг кады ажылдажылгазы дээш, РФ-тиң чырыдыышкын сайыды Сергей Кравцовка база оралакчы сайыт Андрей Николаевка байырын чедирген.

Россияның Чырыдыышкын яамызының бадылааны санаашкыннар езугаар, 2024 чылда республиканың алды школазынга капитал септелгени кылыр болза, 2025 чылда дөрт ниити өөредилге албан черлерин чаартыр.

«Өөредилге хөгжүлдези» күрүне программазы езугаар кылдынар эде чаартылга ажылдарының шугуму-биле, чедери берге суурларда база кожуун төптеринде 40 школаны модернизастаан.

«Өөредилге хөгжүлдези» күрүне программазы-биле школаларның оран-савазын чаартырындан аңгыда, иштики дериишкинин кылып, уругларга-даа, башкыларга-даа таарымчалыг байдалдарны тургузар.

Федералдыг күрүне программазынга киржир чагыгны долдурар дээш, республикада улуг белеткел ажылын организастаан. Регион Баштыңының даалгазы езугаар, Тываның Өөредилге яамызы школаларның капитал септелгезиниң төлевилел-санаашкын смета документилерин чагыыр ажылды кылган. Эрги бажыңнарлыг албан черлеринче онза кичээнгейни угландырган. Владислав Ховалыг республиканың муниципалдыг тургузуглар удуртукчуларын чагыглар ажылдарынче хаара тудуп, көдээ школаларны чаартыр арганы бүрүн ажыглаарынче кыйгырган.

Федералдыг программа боттандырылгазы-биле бо чылын Тываның 13 школазын: Шагаан-Арыг хоорайның гимназиязын, Туран биле Ак-Довурак хоорайларның, Чал-Кежиг, О-Шынаа, Бүрен-Аксы, Сесерлиг, Дөң-Терезин, Тоора-Хем, Сарыг-Сеп, Булуң-Терек база Сосновка суурларның школаларын бүрүнү-биле чаарткан.