2026 чылга чедир Тывага бок аңгылаар комплексти ажылдадыр

Тываның эрге-чагыргазы бок аайлап аңгылаар комплекс тудар инвесторну тыпкан. Кадыг боктар-биле ажылдаар регионалдыг оператор «ТСП» КУБ-туң иштинде «Вторэкопром» КХН ол ажылдарны кылыр.

Республика чазаанга регионалдыг Арга-арыг ажыл-агый болгаш бойдус ажыглалының яаамызының кииргени концессиялыг дугуржулга керээзи-биле төлевилелди боттандырар деп шиитпирлээн. Компания ооң тудуунче 2,14 млрд. рубльди киириштирер ужурлуг. Чылда 70 муң тонна кадыг бок болбаазырадыр күчүлүг комплексти 2026 чылда ажыглалче киириптерге, 2048 чылга чедир инвесторнуң удуртуп-башкарылгазынга турар.

Бүдүрүлге кадыг боктар аайлап аңгылаарындан аңгыда, RDF-одаар чүүлдү бүдүрер. Ыяш, кеш, чук, саазын, кылын саазын, пөс-таавы, пластик болгаш өске-даа кыва бээр бок аймаан үүрмектеп, борбактааш одаар чүүлдү алыр. Хөмүр орнунга RDF-одаар чүүлдү котельнаяларга база ЧЭТ-ке ажыглап болур. Комплекс чылда-ла 10,5 муң тонна хире шак ындыг одаар чүүлдү бүдүрер.