Тывада тудуг черлери 33 дөрбелчин метрден эвээш шөлдүг квартиралар тутпас

Тываның Баштыңы Владислав Ховалыг чаа тудар хөй аалдыг бажыңнарда квартиралар шөлүн эвээжетпес дээш хемчеглерни алырын республиканың Тудуг яамызынга дааскан.

Октябрьның 5-6 хүннеринде Кызылга эрткен тудуг шуулганының үезинде көдүрүлген айтырыглар олче удур базымны кылырынга чылдагаан болган.

Хөй аалдыг бажыңнар төлевилелинде биче шөлдүг квартиралар үлүүн көвүдерин тудуг черлери кызыдып турарын элээн каш эксперттер шуулган үезинде дыңнаткан. Ынчангаш квартираларның шөлүнүң хемчээлдери кызырлып бар-ла чыдар. 2023 чылда чаа тудугда эң бичии квартираның шөлү 25 дөрбелчин метр болган.

Республиканың төвү чүгле Кызыл хоорайда бөгүнде тудуп турар хөй аалдыг 30 ажыг бажыңнарда 1 муң ажыг чаңгыс өрээлдиг квартиралар барын ТР-ниң Тудуг яамызы дыңнаткан. Оларның 300-зү, азы үштүң бир кезии Россияда чааскаан чурттап турар кижиге доктааткан кудуку норма – 33 дөрбелин метрден эвээш шөлдүг.

Чурттакчы чоннуң кол кезииниң күзелин боттандырар ындыг базымны кылыры-биле квартираларның шөлүн бичиилеткенин тудугжулар тайылбырлаан. Бүгү чуртта, Тывада база, “чаңгыс өрээлге” хереглел шынап-ла көвүдээни шын.

Тудуг организацияларның чаа тудугларда квартиралар шөлүн бичеледир дээн чүткүлүн шеглээр хемчеглерни ноябрьга чедир саналдап киирер даалганы республиканың Тудуг яамызынга берген. Тудуг организациялары-биле керээ чарар бүдүүзүнде, бичежек бажыңның хемчээли – бир өрээл квартирага 33 дөрбелчин метр болурун айыткан дугуржулганы чарарын көрүп турар. Оон эвээш шөлдүг төлевилелдерни боттандырылгаже киирбес.