Тываның Баштыңы вице-премьер Виктория Абрамченко-биле ажыл-агый аайы-биле ужурашкан

Владислав Ховалыг РФ-тиң Чазааның даргазының оралакчызы Виктория Абрамченко-биле ужурашкаш, регионнуң социал-экономиктиг хөгжүлде айтырыгларын сайгарып чугаалашканын бодунуң социал четкилеринде дыңнаткан. Республика удуртукчузу өөредилге инфраструктуразының хөгжүлдези, чиигелделиг ипотека программазының боттанылгазы база инженер коммуникацияларының модернизациязы - мурнады боттандырар угланыышкынныг ажылдары ол деп айыткан.

Виктория Валериевна Сибирь федералдыг округтуң куратору болгаш, кезээде республиканы деткип, практиктиг дузаны көргүзүп чоруурун Владислав Ховалыг демдеглээн.

Москвага ажыл-агыйжы сургакчылаашкын үезинде, регионга чугула төлевилелдерни болгаш программаларны 2024 чылдың бюджединче киирер айтырыг-биле тускай угланыышкынныг федералдыг яамыларда ажылдап турарын вице-премьерге дыңнаткан. «Россия» делегей чергелиг делгелге-форумга Тываның экспозициязының белеткел ажылдарын база чугаалаан. Президентиниң бергени Төп-Евразия коридорунга хамааржыр чурттар аразының төлевилелдерин шимчедир сорулгалыг даалгазында Тываның төлевилелинге бодалын база чугаалаан.

Владислав Ховалыг «Сибирь дугуржулгазы» регионнар аразының ассоциация кежигүнүнде бодунуң ажылында мурнады боттандырар угланыышкынче чурттар аразының коридорун тудар төлевилелди бурунгаарладырын вице-премьерге дыңнаткан. 2035 чылга чедир боттандырар Сибирьниң Стрегиязының хемчеглер даңзызынче ук төлевилел кирип турар.