Россияның Чазаанга Тываның энергия хандырылгазының комплекстиг планының күүселдезин чугаалажып көрген

Тыва Республиканың Баштыңы Владислав Ховалыг РФ-тиң Чазааның Даргазының оралакчызы Александр Новактың удуртуп эрттиргени Тыва Республикада Энергия хандырылгазының коплекстиг планы кайы хире күүсеттинип турарын сайгарган хуралга киришкен. Регионнуң ниити хөгжүлдезинге база инвестия төлевилелдерин ажылдадырынга план күүселдези республикага 240 МВт немелде күчүнү бээр.

2021 чылдың декабрьда Александр Новак Тываның девискээринде инвестиция болгаш социал объектилерни энергия-биле хандырарының комплекстиг планын бадылаан турган. Планның боттанылгазын вице-премьер бодунуң контролюнда алган. Тываның Баштыңы Владислав Ховалыг республика чурттакчыларынга эргежок херек төлевилелче ындыг кичээнгейи дээш Александр Валентиновичиге четтиргенин илереткен.

Тываның төлээлери, федералдыг тускай угланыышкынныг яамылар болгаш инвесторлар киришкен хуралга амгы үеде чоруп турар ажылдарның статузунуң дугайында дыңнаткан. Амгы үеде Росчетки кампания республиканың Бии-Хем биле Тожу кожууннарының чедери берге девискээрлеринде 312 км-ге шөйлү бээр Туран-Туманная деп электри шугумун тудуп турар. Чырык шугуму келир үеде аңаа ажыттынар Ак-Сугнуң даг-болбаазырадылга комбинадын база Тожу кожуунун энергия-биле хандырар. Чырык хандырылгазының шугумун 2024 чылдың төнчүзүнде ажыглалче киирери планнаттынган.

Планның арткан өске хемчеглериниң документилери күрүне экспертизазын эртип турар. «Туран – Туманная» ЧЭШ-тен хандыртынар Ырбан подстанциязының төлевилел-санаашкын документилери хынаашкында. 

«Росчетки» Тываның, Хакасияның база Красноярск крайның мурнуу талазында инвесторларның болгаш республика эрге-чагыргазының сонуургалында - Аг-Сугнуң, Кызыл-Таштыгның база Кара-Белдирниң даг-болбаазырадылга  комбинады дөрт инвестиция төлевилелдерин боттандырар планныг.

- План боттаныышкыны Тывага социал-экономиктиг дээштиг үре-түңнелдерни бээр. Баш бурунгаар санаашкыннардан алырга, 2030 чылга чедир регион 250 млрд рубль инвестицияны хаара тудуп, 10 муң ажыг ажылчын олуттарны тургузар. Үлетпүр бүдүрүлгези 73 млрд рубльга көвүдээр, а республика бюджединче немей 36,5 млрд рубль кирер – деп, Владислав Ховалыг чугаалаан.