Тыва Республиканың баштыңы РФ-тиң транспорт сайыдының оралакчызы Игорь Чалик-биле ужурашкан

Кызылдың ужар чүүл комплекизиниң чаартылгазы шудургузу уламчылап турар. Ол бүгү чүгле эрттирилгениң делегей чергелиг черин ажыдары-биле холбашпаан. Пассажирлер аргыштырылгазы болгаш чүък сөөртүлгези шапкынчаан үеде чедирип турар ачы-дузаның деңнелин бедидери тоң чугула. Чүгле бо чылдың 9 айының дургузунда Кызылдың аэропорту 85 ажыг муң кижини эрттирген, ол дээрге 2022 чылдың деңнели-биле 93 хуу-дур. Чылдың төнчүзүнге чедир ам-даа 110 муң пассажирни аргыштырар. Boing 737 болгаш Airbus A320 деп самолеттарга рейстерни күүседип шыдаар шинектиг улуг авиакомпанияларны хаара тудар план бар. Оон аңгыда, аэропорттуң өртке удур камгалалын 7-ги деңнелге чедир бедидерин оралакчы сайыт-биле база чугаалашкан.

- Пассажирлер аргыштырылгазының сан-медээзи өске айтырыгның шиитпирлээшкининге база улуг рольду ойнап турар. Тываның чурттакчылары шүүделин эгидер билеттерге сонуургалдыг болгай. Хөй ажы-төлдүг өг-бүлелер, хоочуннар бо талазы-биле меңээ дилеглиг кээп турар. Амгы үеде Кызылдан Москва, Красноярск, Новосибирск, Иркутск болгаш Улан-Удэ хоорайларже доктаамал рейстер ужуп турар. 2024 чылда федералдыг бюджеттен шүүдел акшазының хемчээлин көвүдедирин чедип алыр сорулгалыг бис – деп, В. Ховалыг соцчеткилерде бодунуң арынында бижээн.