Тываның дөрт кожуунунда көвүрүглерни «Айыыл чок болгаш шынарлыг оруктар» национал төлевилел-биле септеп турар

Бо чылын Тываның Каа-Хем, Бай-Тайга, Барыын-Хемчик база Мөңгүн-Тайга кожууннарда көвүрүглерни «Айыыл чок болгаш шынарлыг оруктар» национал төлевилел боттанылгазы-биле септеп, чаартыр. Ынаар 180 млн рубльди тускайлаан, ооң 64 млн – федералдыг бюджет акша-хөреңгизи. Тываның орук-транспорт сайыды Шораан Чыргал-оол ооң дугайында дыңнаткан.

«Сарыг-Септиң ОТСУ» КХН-ниң орукчулары Каа-Хем кожуунда Дерзиг хемни кежир көвүрүгнүң ооргаларын, үстүкү болгаш доора чудуктарын, кижи кылаштаар оруун болгаш өске-даа черлерин солаан. Объектини келир чылдың майда ажыглалче киирер.

«Восток» КХН Кызыл-Мажалык-Аянгаты автоорукта Улуг Аянгатыны кежир көвүрүгде аварийлиг-тудуг ажылдарын бо чылдың июльда дооскан. Объектиге тудуг ажылдары ийи чадада эрткен, бөгүн ону ажыглалче дужааган.

Республиканың орукчулары бөгүнде Алаш хемни кежир көвүрүг тудуунда ажылдап турарын регионалдыг Орук-траспорт яамызы дыңнаткан. Объектиниң техниктиг белени – 20%.

Хандагайты-Мугур-Аксы автооруунда Барлык хемни кежир көвүрүгнү септээр кылдыр «Восток» КХН-биле күрүне керэзи чардынган. Компанияның орукчулары септелге ажылдарынче кирген, амгы үеде ында ажылдар 30 хуу кылдынган.

«2030 чылга чедир үеде Россия Федерациязын хөгжүдериниң национал сорулгалары болгаш стратегтиг айтырыглары» деп Президент чарлыының айыткалын күүседир дээш, Россияның Транспорт яамызы «Айыыл чок болгаш шынарлыг оруктар» национал төлевилелди ажылдап кылганын сагындыраал.