Тываның Баштыңы «Сибирь дугуржулгазы» регионнар аразының ассоциация хуралынга киришкен
18.10.2023
РФ-тиң субъектилериниң экономиктиг кады ажылдажылгазының «Сибирь дугуржулгазы» регионнар аразының ассоциация кежигүннериниң 99-ку хуралы видеоконференцхарылзаазы-биле болуп эрткен. Ассоциацияның кежигүннери ПМЭФ-2023 шөлүнге көргүскени «Улуг Сибирь» коллективтиг экспозицияга кады ажылдаан үре-түңнелдерин сайгарып, келир чылда МАСС-тың ажыл планынче киирер саналдарын солушкан.
Тываның Баштыңы Владислав Ховалыг МАСС-тың транспорт талазы-биле Координация чөвүлелиниң даргазы болуп турар. Келир чылын чөвүлелдиң мурнады боттандырар ажылынга Тыва Республиканы таварты чурттар аразының оруун тудар төлевилелди бурунгаарладыр.
Тыва Красноярск край-биле кады Урумчиже чурттар аразының коридорун идепкейлиг идип турар. Демир-орук оруунуң чаа угланыышкыны Транссибтиң чүъгүн чиигедип, чүък аргыштырылгазының чаа угланыышкынын ажыдар деп, бо регионнар санап турар. ПМЭФ-2023-түң дискуссия шөлчүгежинге Сибирь регионнарының удуртукчулары демир-орук коридорун тудар төлевилелдиң күчү-шыдалынга хамаарыштыр боттарының көрүүшкүнүн илереткен. Амгы үеде «Россия-Моол-Кыдат» чурттар аразының оруунуң маршрудунда онза экономиктиг зонаның кол өзээ апаар Моол - Тыва кызыгаарында «Хандагайты» кызыгаар эрттирилге пунктузунда эде чаартылга ажылдары чоруп турар.
Чурттуң Президентизиниң даалгазы-биле, Моол база Барыын Кыдат таварар Төп-Евразия транспорт коридорунуң айтырыын Россияның Чазаанда ажылдап эгелээнин демдеглээли.
Возврат к списку
|