Тыва 9 айның түңнелдери-биле кем-херек үүлгедиишкиннериниң көргүзүүн эвээжеткен

Россияның Иштики херектер яамызы кем-херек үүлгедиишкинин эвээжеткен регионнар санында Тываны база адаан.

Регионнуң иштики херектер сайыды Сергей Кондрашов ооң дугайында аппарат хуралында республика баштыңы Владислав Ховалыгга илеткээн. Ооң дыңнатканы-биле алырга, январь – сентябрьда бүрүткеттинген кем-херектерниң ниити саны 2022 чылдың ол үезинге деңнээрге 18,6 хуу (Россияда – 2,1 хуу), 2021 чылдың сентябрьга деңнээрге – 37 хуу эвээжээн.

«Россия Федерациязының Иштики херектер яамызы бистиң республикада кем-херек үүлгедиишкиннерин эвээжедир талазы-биле эки көргүзүглерлиг болганын демдеглээн деп, Тываның иштики херектер сайыды Сергей Николаевич Кондрашов дыңнатты. Биске эки чедиишкин-дир. Корум-чурум камгалакчыларының ажыткан кем-херектериниң саны чеди хуу өскен. Ниитилелде кеземче чайлаш чогун биле берген болгаш, кем-херек үүлгедиглери баткан. Профилактиктиг ажылдар база дээштиг болган» - деп, Тываның Баштыңы Владислав Ховалыг бодунуң блогунда бижээн.

Аар болгаш онза аар кем-херектер саны кызырылган, ооң санында өлүрүүшкүннер – 27,2 хуу, кадыкшылга өжегерээн аар хора чедирери – 12,4 хуу эвээжээн. Оор чорук 30,5 хуу, хөй-ниити черлеринге кем-херектер 27,5 хуу, үптээшкиннер – 41,8 хуу эвээжээн. Кем-херек үүлгедиишкининиң сөөлгү үш хевири үш чыл дургузунда 2 база оон каш катап кызырылган.

Корум-чурум камгалакчылары элээдилерниң кем-херек үүлгедиишкининче эрге-чагырганың кичээнгейин угландырган. 2023 чылда илереттинген кем-херек үүлгедикчилериниң ниити санында назы четпээннерниң үлүү-биле Тыва чурттуң регионнар аразында бирги черже үнүп, 7,2 хуу болган. Чыл бурунгаар республика ол көргүзүг-биле РФ-те ийиги черге турган.

Оон аңгыда, республикада кем-херек үүлгедиглериниң 46 хуузун эзирик байдалда кылган. Амы-тынга болгаш кадыкшылга удур аар херектерни эзирик үүлгедип турар.