Тывада үш уруглар лагерин 2026 чылда төнчүзүнге чедир септеп-селиир

Россияның Чырыдыышкын яамызының уруглар дыштанылгазының инфраструктарын эде чаартыр конкурстуң түңнелдери-биле Барыын-Хемчик кожуунда «Таежный», Тес-Хемде «Сайлык» база Улуг-Хемде «Чодураа» уруглар лагерьлеринге капитал септелгелерни чорудар. Дыштанылга лагерьлерин чаартырынче 60 ажыг млн рубльди угландырар.

Тываның Баштыңы Владислав Ховалыг уруглар дыштандырар черлерге септелге ажылдары келир чылын эгелээш, 2026 чылдың төнчүзүнде доостурун дыңнаткан: - Федералдыг деткимче-биле уруглар дыштанылгазынга болгаш кадыкшылгазынга таарымчалыг байдалдарны тургузар бис – деп, ол демдеглээн.

Ак-Довурак хоорай чагырга даргазының албан хүлээлгезин күүседип турар Андрей Сат хөй ажы-төлдүг өг-бүлелерден уруглар дыштанылгазын чылдың-на организастап турар лагерьни септээр дээн чагыгны деткээни дээш четтиргенин илереткен: «Июльда чаа-ла "Таёжный" уруглар лагериниң дугайында чугаалажып турган болзувусса, ам бөгүн үре-түңнел көстүп келген. Улуу-биле четтирдивис! Ам төлевилелди амыдыралга боттандырары арткан. Ону албан кылыптар бис!».

“Таежный” уруглар лагери Ак-Довурак хоорайның өөредилге эргелелинге хамааржыр болгаш, Барыын-Хемчик кожууннуң чурумалдыг черинде турар. 2025 чылда лагерь чаартынган корпустарынга уругларны хүлээп эгелээр. Тес-Хем кожууннуң Самагалтай суурнуң 2 дугаар школазының чанында бактааттынган “Сайлык” уруглар 2026 чылда ажылын эгелээр. Бо чылын «Чодураа» лагерин чаартып турар.

Россияның Президнетизи Владимир Путинниң даалгазы езугаар, уругларны кадыкшыдып дыштандырар тускай инфраструктура тудар ажылдар 2030 чылга чедир уламчылаар. Субъектилер боттарының бюджеттеринден программаны кады акшаландырар. Тывага ол сорулгага федералдыг бюджеттен 65 млн. рубльди тускайлаан.