Тываның Баштыңы Россияның кадык камгалал сайыдының оралакчызы-биле республикага чаа объектилер тудуун сайгарып чугаалашкан

Тываның Баштыңы Владислав Ховалыг Россияның кадык камгалал сайыдының оралакчызы Наталья Хоровая-биле ужурашкан. Кызылга республиканың уруглар эмнелгезин тударының “орук картазын” чаартырын база республикага туберкулез эмнелгези биле онкология төвүнүң төлевилге ажылдары кайы хире чоруп турары ийи тала чугаалашкан. Чурттуң Президентизи ол угланыышкында кадык камгалалының чаа объектилерин тудар дээн регионнуң инициативазын деткээн.

2021 чылдың чайынында, Владислав Ховалыг Тываның Баштыңының албан хүлээлгезин күүседип турар үеде, Владимир Путин-биле видеоконфенрец харылзаазы-биле эрткен ажылчы ужуражылгада республиканың туберкулёз болгаш онкология диспансерлериниң оран-саваларны чаартыр айтырыгны көдүрүлген.

Ынчан чурттуң удуртукчузу ыжык аарыглары база туберкулез талазы-биле регионнуң көргүзүглери элээн улуг деп айыткан. Регионнуң Чазаа байдалды эдер дээш бар-ла аргаларны ажыглап, Тываның дыка хөй эмнелге албан черлерин эде чаартыры негеттинип турарын Владислав Ховалыг дыңнаткан. Тываның Кадык камгалал яамызы чаа онкодиспансер тудуунуң төлевилелин ажылдап кылганын ооң чижээнге чугаалаан.

Владимир Путинниң даалгазы-биле федералдыг Кадык камгалал яамызы Тывага онкология төвү биле туберкулезка удур диспансер эмнелгелериниң төлевилелинге акша-хөреңгини тускайлаан.

Владислав Ховалыг Наталья Хоровая-биле ужуражып тура, аарыгларны болдурбас база эрте чадазында илередир системаның кадык камгалал объектилериниң төлевилге ажылдары кайы хире чоруп турарын илеткээн. Уруглар эмнелгезин тудар тудуг организациязы чыл төнчүзүнге чедир төлевилге ажылдарын дооскаш, 2024 чылдың март 1-ге чедир күрүне экспертизазының түңнелин алыр планныын дыңнаткан.